Քաղաքականություն
28.10.2021 | 15:03
Ֆրանսիան Բելառուսի ղեկավար Ալեքսանդր Լուկաշենկոյի ընտանիքին մեղադրել է մարդկանց կազմակերպված առևտրի մեջ։ Լուկաշենկոյի հարազատները նպատակաուղղված կերպով կազմակերպում են Բելառուս ժամանող ներգաղթյալների ուղևորությունները դեպի Եվրամիության երկրների հետ սահմաններ։ DW-ի ռուսական ծառայության հաղորդմամբ՝ այս մասին հայտարարել է Ֆրանսիայի ԱԳՆ-ի եվրոպական հարցերով պետքարտուղար Կլեման Բոնը՝ չնշելով կոնկրետ անուններ։
Նրա խոսքով՝ բելառուսական կողմի նպատակը ԵՄ-ն թուլացնելն ու պառակտելն է։
«Լուկաշենկոն ցանկանում է Եվրամիությանը թակարդի մեջ գցել՝ պնդելով, որ Եվրոպան խախտում է սեփական սկզբունքները»,- ասել է Բոնը։
Ֆրանսիացի դիվանագետը հորդորել է գործել «վճռական և մարդկայնորեն» լեհ-բելառուսական սահմանին տիրող իրավիճակում։
Հիշեցնենք՝ մայիսին Լուկաշենկոն հայտարարեց, որ Մինսկն այլևս հետ չի պահի ներգաղթյալներին ԵՄ երկրներ հետագա ճանապարհորդությունից: Դրանից հետո անօրինական միգրանտների հոսքը կտրուկ ավելացել է, առաջին հերթին՝ դեպի Լիտվա և Լեհաստան։ Լեհաստանի և Բելառուսի սահմանին կոնֆլիկտի հետևանքով մի քանի ներգաղթյալ արդեն մահացել է։
Բրյուսելը Մինսկին մեղադրել է միգրացիոն ճգնաժամի միտումնավոր հրահրման մեջ՝ ի պատասխան այն պատժամիջոցներին, որոնք Եվրոպան սահմանել է Լուկաշենկոյի ռեժիմի դեմ։
Սեպտեմբերին Եվրահանձնաժողովի ղեկավար Ուրսուլա ֆոն դեր Լյայենը նշել էր, որ Եվրամիությունը պատրաստ է դիմակայել «հիբրիդային հարձակմանը», որի համար Բելառուսի իշխանություններն օգտագործում են ներգաղթյալներին։ ԵՄ-ն պատրաստում է պատժամիջոցների հինգերորդ փաթեթը Լուկաշենկոյի ռեժիմի դեմ՝ միգրանտներին Եվրամիության դեմ որպես գործիք օգտագործելու պատճառով։
Տաթև Ֆռանգյան
