29.06.2026 | 14:25
ՀՀ ֆինանսների նախարարն ու ԿԲ նախագահը միջազգային ներդրողներին ներկայացրել են Հայաստանի մակրոտնտեսական զարգացումները
Մոսկվայում ԱՄՆ դեսպանատունը կարող է դադարեցնել իր գործառույթների մեծ մասի իրականացումը. The Guardian
Քաղաքականություն
28.10.2021 | 16:06
Մոսկվայում ԱՄՆ դեսպանատունը կարող է դադարեցնել իր գործառույթների մեծ մասի իրականացումը և հաջորդ տարի աշխատանքը հասցնել նվազագույնի, եթե Ռուսաստանի հետ համաձայնություն ձեռք չբերվի դիվանագետների համար վիզաների քանակի ավելացման վերաբերյալ, գրում է The Guardian-ը։
Հոկտեմբերի սկզբին ԱՄՆ-ը դադարեցրել է վիզաների տրամադրումը Մոսկվայում, և ՌԴ քաղաքացիները վիզա ստանալու հաար ստիպված են մեկնել Վարշավայում ԱՄՆ դեսպանատուն։
«Մենք պետք է շուտով առաջընթաց գրանցենք։ Մենք կբախվենք մի իրավիճակի, երբ մեզ համար դժվար կլինի շարունակել դեսպանատան աշխատանքը՝ բացառությամբ ժամանակավոր հիմունքների»,- լրագրողներին ասել է Պետքարտուղարության բարձրաստիճան պաշտոնյան:
«Մենք ամեն ինչ կանենք՝ դիվանագիտական առաքելությունը բաց պահելու համար»,- հավելել է նա՝ զգուշացնելով, որ դեսպանատան այլ գործառույթներ, օրինակ՝ դիվանագիտական նամակներ ուղարկելը, կդժվարանա առանց լրացուցիչ անձնակազմի։
Ռուսաստանն ու Միացյալ Նահանգները ապրիլին հետ կանչեցին իրենց դեսպաններին այն բանից հետո, երբ ԱՄՆ նախագահ Ջո Բայդենի վարչակազմը պատժամիջոցներ սահմանեց և վտարեց 10 ռուս դիվանագետների՝ Մոսկվային մեղադրելով կիբերհարձակումների և ամերիկյան ընտրություններին միջամտելու մեջ:
Դեսպանները վերադարձել են հունիսին, սակայն Մոսկվայում դեսպանության անձնակազմի թիվը կրճատվել է 2017 թվականի սկզբին՝ 1200 աշխատակցից հասնելով 120-ի։ Այս մասին հայտնել է Պետքարտուղարության աշխատակիցը։
Նա հայտնել է, որ դեսպանությունում չկան բավարար թվով աշխատակիցներ հիմնական խնդիրները կատարելու համար, ինչպես, օրինակ, դիվանագիտական ներկայացուցչության դարպասներ բացել-փակելը, հեռախոսային զանգերի անվտանգության ապահովումն ու վերելակների սպասարկումը։
Ռուսաստանն օգոստոսի 1-ից արգելել է դեսպանություններին ՌԴ-ից կամ երրորդ երկրից աշխատակիցների վարձել, ինչի արդյունքում ԱՄՆ-ը ստիպված է եղել աշխատանքից ազատել ավելի քան 200 մարդու։
Տաթև Ֆռանգյան
