ԱՄՆ-ն շարունակելու է Թուրքիայում պաշտպանել մարդու իրավունքները․ Պետդեպի խոսնակը՝ Անկարայում արևմտյան երկրների դեսպանատների կոչի մասին

ԱՄՆ Պետքարտուղարության խոսնակ Նեդ Փրայսը նախօրեին կայացած ճեպազրույցում խոսել է Անկարայի հետ հարաբերություններում վերջին լարվածությունից՝ կապված Թուրքիայի նախագահ Ռեջեփ Թայիփ Էրդողանի՝ ԱՄՆ-ի և մի շարք այլ երկրների դեսպաններին «պերսոնա նոն գրատա» ճանաչելու մտադրության հետ։ Այս մասին տեղեկանում ենք ԱՄՆ Պետքարտուղարության պաշտոնական կայքից։

«Դեսպան Սաթթերֆիլդը Թուրքիայում է։ Նա ծառայում է որպես ԱՄՆ դեսպան Թուրքիայում։ Մենք ի գիտություն ենք ընդունել նախագահ Էրդողանի վերջին հայտարարությունները։ Մենք շարունակելու ենք խթանել օրենքի գերակայությունն ու մարդու իրավունքների հարգումն ամբողջ աշխարհում։ Բայդենի վարչակազմը ձգտում է համագործակցել Թուրքիայի հետ ընդհանուր առանջնահերթությունների շուրջ։ Եվ ինչպես ՆԱՏՕ-ի ցանկացած դաշնակից՝ մենք շարունակելու ենք երկխոսությունը ցանկացած տարաձայնություն լուծելու համար։ Մենք հավատում ենք, որ առաջ գնալու լավագույն ճանապարհը փոխադարձ շահավետ հարցերի շուրջ համագործակցությունն է, և մենք գիտենք, որ ունենք Թուրքիայի հետ փոխադարձ հետաքրքրություն ներկայացնող հարցեր»,- ասել է Փրայսը։

Խոսելով Թուրքիայում ԱՄՆ դեսպանատան վերջին հայտարարության մասին՝ Փրայսն ասել է, որ դա արվել է՝ ընդգծելու, որ հոկտեմբերի 18-ի հայտարարությունը համապատասխանում է Վիեննայի կոնվենցիայի 41-րդ հոդվածին։
«Մենք հաստատակամ ենք մեր օրենքի գերակայությունն ու մարդու իրավունքների հարգումն ամբողջ աշխարհում խթանելու մեր հանձնառության մեջ։ Այդ հանձնառությունն անսասան է, և մենք շարունակելու ենք Թուրքիայի հետ համագործակցել 41-րդ հոդվածին համապատասխան»,- ասել է ԱՄՆ Պետքարտուղարության խոսնակը։

Նա նաև նշել է, որ հոկտեմբերի 18-ին Թուրքիայում ԱՄՆ-ն ու ևս 9 երկրների դեսպանատների հայտարարությունը համապատասխանում է Վիեննայի կոնվենցիայի 41-րդ հոդվածին։

Հիշեցնենք՝ նախօրեին Թուրքիայի նախագահ Ռեջեփ Թայիփ Էրդողանը հայտնել էր, որ արևմտյան 10 երկրների դեսպաններին «պերսոնա նոն գրատա» («անցանկալի անձ») հայտարարելու հետ կապված ճգնաժամը լուծված է այն բանից հետո, երբ դեսպանատները նոր հայտարարություն են տարածել։

Թուրքիայում ԱՄՆ-ի, Կանադայի ու արևմտյան այլ երկրների դեսպանատները նոր հայտարարությամբ հայտնում են, որ մտադիր են հարգել ընդունող պետության օրենքներն ու կանոնակարգերը և չխառնվել այդ երկրին ներքին գործերին։
Մինչ այդ, Էրդողանը ԱԳՆ-ին հանձնարարել էր երկրից վտարել ու «անցանկալի անձ» ճանաչել ԱՄՆ-ի և արևմտյան այլ երկրների դեսպաններին այն բանից հետո, երբ նրանք միասնական հայտարարություն էին տարածել ակտիվիստ Օսման Քավալային ազատ արձակելու կոչով։ Խոսքն ԱՄՆ-ի, Գերմանիայի, Դանիայի, Ֆինլանդիայի, Ֆրանսիայի, Նիդերլանդների, Շվեդիայի, Կանադայի, Նորվեգիայի, Նոր Զելանդիայի դեսպանատների մասին է։

Էմմա Չոբանյան