23.08.2026 | 13:31
Օդի ջերմաստիճանն աստիճանաբար կբարձրանա 3-5 աստիճանով
ՌԴ Սարատովի մարզում շուրջ 400 բանտարկյալ հայտարարել է խոշտանգումների և կտտանքների մասին
Քաղաքականություն
26.10.2021 | 12:45
ՌԴ Սարատովի մարզի թիվ 3 ուղղիչ գաղութի և տուբերկուլյոզով հիվանդների համար նախատեսված բանտային հիվանդանոցի ավելի քան 400 բանտարկյալներ խոշտանգումների մասին են հաղորդել։ Այս մասին հայտնել է փաստաբան Սնեժանա Մունտյանը։
Ըստ փաստաբանի՝ խոսքն անմիջապես գաղութում խոշտանգումների, ծեծի և փողի շորթման մասին է, գրում է DW-ի ռուսական ծառայությունը։
Նույն օրը մարդու իրավունքների պաշտպանության Gulagu.net նախագծի ղեկավար Վլադիմիր Օսեչկինը «Эхо Москвы» ռադիոկայանին պատմել է, որ միայն Սարատովի մարզի դաշնային քրեակատարողական ծառայության ավելի քան 500 բանտարկյալներ փորձում են բողոք ներկայացնել «խոշտանգումների, կտտանքների և մի շարք դեպքերում բռնաբարությունների մասին, որոնք նրանց նկատմամբ իրականացվել են Սարատովի մարզային տուբերկուլյոզի հիվանդանոցում»:
Ըստ Օսեչկինի՝ «տանջանքների կոնվեյեր է» եղել։ Նա նշել է, որ առաջիկա ամիսներին կհրապարակվեն այլ հաստատություններում ևս խոշտանգումների վերաբերյալ նյութեր։
Հոկտեմբերի սկզբին Gulagu.net նախագիծը սկսեց հրապարակել բանտային հիվանդանոցից նախկին բանտարկյալ, ծրագրավորող Սերգեյ Սավելևից ստացված խոշտանգումների տեսագրությունները: Պայմանական վաղաժամկետ ազատվելուց հետո նրան հաջողվել է ուղղիչ հիմնարկից հանել բանտարկյալների խոշտանգումների տեսաարխիվը։ Հրապարակումից հետո Սավելևը մեկնել է Ֆրանսիա, որտեղ քաղաքական ապաստան է խնդրել։ Ռուսաստանում նրա նկատմամբ հետախուզում է հայտարարվել։
Այս հրապարակումները լայն արձագանք ստացան․ դաշնային քրեակատարողական ծառայությունն արդեն աշխատանքից ազատել է բանտային հիվանդանոցի պետին, նրա տեղակալին, ինչպես նաև մի շարք աշխատակիցների, Սարատովի դաշնային քրեակատարողական ծառայության ղեկավարն էլ հրաժարական է տվել։ Ռուսաստանի Քննչական կոմիտեն իր հերթին հրապարակումից հետո ընդհանուր առմամբ 7 քրեական գործ է հարուցել։
Տաթև Ֆռանգյան
