07.11.2024 | 19:37
Փաշինյանը Բուդապեշտում մասնակցել է «Տնտեսական անվտանգություն» թեմայով կլոր-սեղան քննարկմանը
Ճապոնիան իր մտահոգությունն է հայտնել ՌԴ-ին և Չինաստանին՝ Ցուգարու և Օսումի նեղուցներով նրանց ռազմանավերի համատեղ անցման կապակցությամբ
Քաղաքականություն
26.10.2021 | 15:20
Ճապոնիայի կառավարությունը դիվանագիտական ուղիներով Ռուսաստանին և Չինաստանին հայտնել է, որ անհանգստացած է Ցուգարու և Օսումի նեղուցներով ռուսական ու չինական ռազմանավերի վերջին համատեղ անցմամբ։ Այս մասին մամուլի ասուլիսում հայտարարել է Ճապոնիայի արտգործնախարար Տոշիմիցու Մոտեգին, գրում է ՌԻԱ Նովոստին։
«Ինչ վերաբերում է Ցուգարու և Օսումի նեղուցներով ռուսական և չինական նավերի համատեղ անցմանը, նման բան առաջին անգամ ենք տեսնում և շարունակում ենք հատկապես ուշադիր հետևել գործողություններին։ Դիվանագիտական ուղիներով մենք մեր մտահոգությունն ենք հայտնել երկու երկրներին՝ Ռուսաստանին և Չինաստանին։ Այսուհետև մենք մտադիր ենք հետևել իրավիճակի զարգացմանը»,- պարզաբանել է նախարարը։
Մոտեգին նաև նշել է, որ Ռուսաստանի հետ կապված, բացի նավերի անցման խնդրից, «կան այլ չլուծված խնդիրներ, այդ թվում՝ տարածքային հարցեր»։
«Կան հարցեր, այդ թվում՝ տարածքների վերաբերյալ, որոնց շուրջ բանակցությունները պետք է շարունակվեն․ ավելի վաղ պայմանավորվածություն է ձեռք բերվել, որ երկխոսությունը շարունակվելու է»,- հավելել է նա։
Անցած շաբաթ Ճապոնիայի Պաշտպանության նախարարությունը հայտարարել էր, որ 10 ռուսական և չինական ռազմանավ է անցել Օսումի նեղուցով, իսկ «ժամը 10.00-ին Նագասակի պրեֆեկտուրայի Դանջո կղզիներից 130 կիլոմետր հարավ գրանցվել է ուղղաթիռի թռիչք և վայրէջք չինական ականակրի տախտակամածից»։ Օդ են բարձրացվել Ճապոնիայի օդային ինքնապաշտպանական ուժերի կործանիչներ։
Տաթև Ֆռանգյան
