Ի՞նչ փաստաթուղթ է ստորագրվելու Մոսկվայում․Պուտինը նշել էր զիջումների մասին․ ՏԵՍԱՆՅՈւԹ

Փաշինյան-Ալիև-Պուտին եռակողմ հանդիպման մասին տեղեկությունները պաշտոնական Երևանը չի հաստատում, միևնույն ժամանակ, սակայն, ընդունում են՝ կան տարբեր ձևաչափերով տարբեր հանդիպումների առաջարկներ, որոնք քննարկման փուլում են:

Հիշեցնենք՝ մի քանի օր է՝ հայկական և ռուսական լրատվամիջոցներում տեղեկություններ են շրջանառվում, որ Մոսկվայում նոյեմբերի առաջին տասնօրյակում սպասվում է Փաշինյան-Ալիև-Պուտին հանդիպում, որի ընթացքում եռակողմ հայտարարություններ են ստորագրվելու:

Փաշինյանի նախկին խորհրդական Արսեն Խառատյանի կողմից վերջերս հիմնադրված «Ալիք Մեդիա-Հայաստան» լրատվամիջոցն առաջինը հրապարակեց այս տեղեկությունն ու ընդգծեց՝ նոյեմբերի 9-ը հատուկ է ընտրվել, քանի որ նախորդ տարի այդ օրը Ռուսաստանի նախագահի միջնորդությամբ Հայաստանի վարչապետը և Ադրբեջանի նախագահը ստորագրեցին եռակողմ հայտարարություն, որով դադարեցվեցին ռազմական գործողությունները:

Վարչապետի աշխատակազմի նախկին ղեկավար Արսեն Թորոսյանը միաժամանակ ակնարկում է՝ Փաշինյանի և Ալիևի միջև փաստաթղթերի ստորագրումը չի կարող համարվել կամ ներկայացվել ժողովրդի թիկունքում արված գործողություն, քանի որ այդ աշխատանքները մեկնարկել են այս տարվա հունվարից:

Լրատվամիջոցները երկու փաստաթղթի ստորագրման մասին են հայտնում: Առաջինը վերաբերում է Հայաստան-Ադրբեջան պետական սահմանների սահմանազատմանն ու սահմանագծմանը, որով Երևանն ու Բաքուն ճանաչելու են միմյանց սահմաններն ու տարածքային ամբողջականությունը՝ հիմք ընդունելով 1920-ական թվականների խորհրդային սահմանների քարտեզները, իսկ երկրորդն առնչվում է տարածաշրջանում ճանապարհների ափաշրջափակմանը:

Մոսկվային կայանալիք առաջիկա հանդիպման մասին տեղեկությունների արտահոսքը լրատվամիջոցները, այդ թվում՝ նաև ռուսական պետական, անում են Պուտինի մեկ այլ ուշագրավ հայտարարության ֆոնին: Օրերս Ռուսաստանի ղեկավարը հայտարարել էր, որ դեմարկացիան և դելիմիտացիան Հայաստանի և Ադրբեջանի միջև կարող է իրականացվել միայն Ռուսաստանի մասնակցությամբ:

Քաղաքագետ Անդրիաս Ղուկասյանը քիչ հավանական է համարում այն, որ Մոսկվայում Փաշինյանն ու Ալիևը Պուտինի ներկայությամբ միջազգային պայմանագիր կստորագրեն: Ըստ քաղաքագետի՝ կան հակասություններ, որոնք թույլ չեն տա այդ փաստաթղթերը ստորագրել:

Նոյեմբերի սկզբին կայանալիք հանդիպման և ստորագրվելիք փաստաթղթերի մասին տեղեկությունների ֆոնին խորհրդարանական ընդդիմությունը նախատեսում է վաղը Ազգային ժողովում քննարկում անցկացնել սահմանների դելիմիտացիայի հարցով։

Ընդդիմությունը Փաշինյանից ցանկանում է ստանալ հարցի պատասխանը, թե ի՞նչ փաստաթղթեր է առաջիկայում ստորագրելու:

Նիկոլ Փաշինյանն այսօր խորհրդարանում որևէ կերպ չի անդրադարձել ստորագրվելիք փաստաթղթերի և Ալիևի հետ Մոսկվայում հանդիպման մասին մամուլում շրջանառվող տեղեկություններին, սակայն խոսել է սահմանների դելիմիտացիայի անհրաժեշտության մասին:

Ի՞նչ է սպասվում Հայաստանին 44-օրյա պատերազմի ավարտից մեկ տարի անց՝ անհայտ է: Վերջին զարգացումները ցույց են տալիս, որ հայ ժողովուրդը կարևոր որոշումների մասին տեղեկանում է դրանց ընդունվելուց հետո միայն:

Մանրամասները՝ տեսանյութում։

Նարեկ Կիրակոսյան