Բաքուն շարունակում է հակաիրանական գործողությունները․ Ադրբեջանում արգելափակել են իրանամետ մի շարք կայքեր

Թեհրանի ու Բաքվի միջև լարվածությունը, թվում է, վերջին օրերին թուլացել է՝ պայմանավորված նաև Ադրբեջանի կողմից Գորիս-Կապան ճանապարհի ադրբեջանական վերահսկողության տակ գտնվող հատվածում սեպտեմբերի 15-ին ձերբակալված իրանցի երկու վարորդների ազատ արձակմամբ։ Սակայն Ադրբեջանում հակաիրանական գործընթացները շարունակվում են։
Մասնավորապես, հիմա էլ Ադրբեջանում արգելափակել են մի շարք իրանամետ շիաական կայքեր։ Խոսքը deyerler.org, maide.az, ahlibeyt.az, ehlibet.info, shia.az, islaminsesi.org կայքերի մասին է։ Նրանց քարոզչությունը յութուբում ևս արգելվել է։ Այս մասին ֆեյսբուքյան գրառմամբ հայտնել է ադրբեջանցի կոմպոզիտոր ու մշակութաբան Էլմիր Միրզոևը։
Սոցիալական ցանցերի ադրբեջանական տիրույթում իրանամետ կայքերի այգելափակման լուրն ակտիվորեն տարածվում ու քննարկվում է։

Նշենք, որ Ադրբեջանի իշխանությունները նաև իրանամետ շիա հոգևոր գործիչների ձերբակալություններ ու հարցաքննություններ են իրականացնում։ Ավելի վաղ ձերբակալվել էին «Ադրբեջանի հոգևոր գործիչներ» հասարակական միության 5 անդամներ՝ Սարդար Բաբաևը, Գադիր Մամեդովը, Ջալալ Շաֆիևը, Ալի Մուսաևը և Թամկին Ջաֆարովը։ Ի դեպ, դատարանի որոշմամբ՝ Բաբաևը 4 ամսով կալանավորվել է, նրան պետական դավաճանության մեջ են մեղադրում։ Ձերբակալվել, հարցաքննվել, ապա ազատ է արձակվել նաև հայտնի շիա աստվածաբան, Կրոնի և խղճի ազատության պաշտպանության կենտրոնի ղեկավար Իլգար Իբրահիմօղլուն։

Հավելենք, որ նախօրեին հեռախոսազրույց են ունեցել Ւրանի ԱԳ նախարար Հոսեյն Ամիր Աբդոլլահիանը ու Ադրբեջանի ԱԳ նախարար Ջեյհուն Բայրամովը։ Հայտնի չէ՝ արդյո՞ք այս հարցերը քննարկվել են։ Զրույցից հետո Իրանի ԱԳ նախարարը Թվիթերում գրել է, որ անկեղծ, կառուցողական և ջերմ զրույց է կայացել լիարժեք հարաբերությունների ճանապարհային քարտեզի շուրջ։ Իրանի արտաքին քաղաքական գերատեսչության ղեկավարը նաև նշել է, որ երկու կառավարությունների և երկու ազգերի միջև հարաբերությունները զարգանում են փոխադարձ հարգանքի հիման վրա։

Էմմա Չոբանյան