Կայացել է «Սասունցի Դավիթ» բջջային հավելվածի շնորհանդեսը

Երվանդ Քոչարի թանգարանում բացվել է «Հայ դյուցազնավեպի քոչարյան պատկերապատումը» խորագրով ցուցահանդեսը, որտեղ ներկայացված են Հայաստանի ազգային պատկերասրահի տրամադրած Երվանդ Քոչարի «Սասունցի Դավիթ» էպոսի նկարազարդումների բնօրինակները․ տեղեկացնում են ԿԳՄՍՆ-ից։

Ցուցահանդեսի շրջանակում տեղի է ունեցել նաև «Սասունցի Դավիթ» ինտելեկտուալ և ժամանցային բջջային հավելվածի շնորհանդեսը, որի թարմացումն ու լրացուցիչ նյութերով համալրումն իրականացվել է ՀՀ կրթության, գիտության, մշակույթի և սպորտի նախարարության աջակցությամբ ու «Սասնա տուն» հասարակական կազմակերպության նախաձեռնությամբ։

Ազդարարելով ցուցահանդեսի բացումը՝ Երվանդ Քոչարի թանգարանի տնօրեն Կարինե Քոչարն ընդգծել է, որ ցուցադրությունն իրականացվել է Հայաստանի ազգային պատկերասրահի հետ համագործակցությամբ, և հավելել, որ այս ցուցադրությունը ևս մեկ փորձ է անդրադառնալու հայ ժողովրդի հերոսական անցյալին:

«Մաեստրո Քոչարը գնահատում և արժևորում էր արվեստի զորությունն ազգապահպանման հարցում՝ կարևորելով մշակութային և ազգային ինքնության արժեքների միջսերնդային փոխանցման շարունակականության ապահովումը: 1939 թվականին, երբ նշվում էր էպոսի 1000-ամյա հոբելյանը, և ռուսերենով պատրաստվում էր «Սասունցի Դավիթ» էպոսի ակադեմիական հրատարակությունը, գիրքը ձևավորելու նպատակով հայտարարված մրցույթում Հովսեփ Օրբելու կողմից ընտրվել են Քոչարի աշխատանքները՝ հիմնավորելով, որ Քոչարը մի արվեստագետ է, ում համար արվեստում գաղտնիքներ չկան: Այսօր ցուցադրության են ներկայացված այդ նկարազարդումները, որոնք Քոչարը պատկերել է 7 գրաֆիկական էջերով, կարծես թե վերարտադրելով մեր լեռնաշխարհը հարթաքանդակների տեսքով, որոնց վրա պատկերված են Սասնա դյուցազունների քաջագործությունները»,- նշել է տնօրենը:

Կարինե Քոչարը տեղեկացրել է նաև, որ թանգարանն անցել է ցուցադրությունների կազմակերպման նոր հայեցակարգային ձևաչափի՝ նոր լուծումներով և գաղափարներով, ժամանակակից մեթոդներով՝ ինստալացիաներով այցելուներին փոխանցելու այն հիմնական պատգամներն ու խորհուրդները, որոնք իր գործերում թաքցրել է Քոչարը:

ՀՀ ԿԳՄՍ նախարարության մշակութային ժառանգության և ժողովրդական արհեստների վարչության պետ Աստղիկ Մարաբյանի խոսքով՝ այս ցուցադրությունը, որն իրականացվել է Հայաստանի ազգային պատկերասրահի և Երվանդ Քոչարի թանգարանի համագործակցությամբ, լավագույն օրինակներից է, քանի որ գործերի հիմնական մասը ներկայացված է ՀԱՊ-ից: Մեծ հետաքրքրություն է ներկայացնում ցուցադրության ձևաչափը՝ Քոչարի ստեղծագործությունները ներկայացնելով արդի տեխնոլոգիաների միջոցով:

«Նախարարությունը կարևորում է միջմշակութային և մշակույթ-կրթություն կապի ամրապնդումը, ազգային արժեքների, ինքնության սիմվոլների ներկայացումը դպրոցականների և երիտասարդների շրջանում: Այս համատեքստում հատկապես կարևորվում է «Սասունցի Դավիթ» հավելվածի ստեղծումը, որը պատրաստվել է դեռևս տարիներ առաջ և նախարարության աջակցությամբ կատարելագործվում է: Սա հիանալի միջոց է հենց նորագույն տեխնոլոգիաների շնորհիվ, ժամանակակից սերնդի պահանջներին համապատասխան ներկայացնելու մեր մշակույթն ու ժառանգությունը, սեր և հետաքրքրություն սերմանելու երիտասարդների շրջանում»,- եզրափակել է Աստղիկ Մարաբյանը:

«Սասնա տուն» հասարակական կազմակերպության փոխնախագահ Տավրոս Ավագյանի նշմամբ՝ հաշվի առնելով տեղեկատվական տեխնոլոգիաների սրընթաց զարգացումը, ինչպես նաև երիտասարդ սերնդի հետաքրքրությունները՝ «Սասունցի Դավիթ» էպոսի հանրահռչակումն ու տարածումը առավել արդյունավետ դարձնելու նպատակով 2017 թվականին ՀՀ մշակույթի նախարարության աջակցությամբ ստեղծվել է «Սասունցի Դավիթ» ինտելեկտուալ և ժամանցային բջջային հավելվածը, որը մեծ հետաքրքրություն է առաջացրել:

«Հետագայում ստեղծել ենք հավելվածի անգլերեն տարբերակը, ինչպես նաև ավելացրել նոր բաժիններ և խաղեր: Ավելի ուշ հավելվածը, ԿԳՄՍ նախարարության կողմից փորձաքննություն անցնելով և դրական եզրակացություն ստանալով, ընդգրկվել է կրթական համակարգում՝ որպես էպոսի ուսուցման հավելյալ նյութ: Հետևաբար, հավելվածն ավելի հետաքրքիր դարձնելու համար կարևոր է այն հարստացնել նոր բաղադրիչներով: Այս տարի ՀՀ ԿԳՄՍ նախարարության աջակցությամբ էպոսի ճանաչելիության բարձրացման նպատակով ստեղծեցինք ևս մեկ ինտելեկտուալ խաղ՝ «Բառախաղ», ինչպես նաև ավելացրեցինք ևս երեք՝ «Գիրք», «Պատկերասրահ» և «Կոմիքս» բաժինները»,- ասել է կազմակերպության փոխնախագահը և ներկայացրել հավելվածը:

Նշենք, որ հավելվածը ներբեռնելու համար հարկավոր է բջջային հեռախոսի «Փլեյ մարկետ» («Play Market») կամ «Ափ սթոր» («App Store») դաշտերում որոնել հավելվածը` հայերեն կամ անգլերեն գրելով Սասունցի Դավիթ («Sasunci Davit»):