Քաղաքականություն
25.10.2021 | 15:24
Հավաքական անվտանգության պայմանագրի կազմակերպության (ՀԱՊԿ) երկրների զինծառայողները սկսել են զորքերի և զինտեխնիկայի դուրսբերումը Տաջիկստանից՝ Աֆղանստանի սահմանի մոտ անցկացվող զորավարժություններից հետո։ Այս մասին հայտնում է «Ինտերֆաքսը»։
«Հայաստանի, Բելառուսի, Ղազախստանի, Ղրղզստանի, Ռուսաստանի և Տաջիկստանի զինված ուժերի զինծառայողները, որոնք ներգրավված են Հավաքական անվտանգության պայմանագրի կազմակերպության (ՀԱՊԿ) համատեղ զորավարժություններում, Հարբ-Մայդոն և Մոմիրաք զորավարժարաններից սկսել են վերադառնալ իրենց մշտական տեղակայման վայրեր»,- հաղորդում է Կենտրոնական զինվորական շրջանի մամուլի ծառայությունը:
Զորքերի և զինտեխնիկայի տեղափոխմանը ներգրավված են 201-րդ ռազմակայանի ավիացիոն խմբի ուղղաթիռները և օդատիեզերական ուժերի ինքնաթիռները։
Հոկտեմբերի 18-23-ը Աֆղանստանի հետ սահմանից ոչ հեռու Տաջիկստանի երկու ուսումնական զորավարժարաններում անցկացվել են ՀԱՊԿ միանգամից երեք զորավարժություններ՝ «Որոնում 2021» հետախուզական զորավարժությունները, «Փոխգործակցություն 2021» արագ արձագանքման ուժերի վարժանքներն ու «Էշելոն -2021» նյութատեխնիկական ապահովման ստորաբաժանումների վարժանքները։
Զորավարժություններին մասնակցել են ՀԱՊԿ երկրների ավելի քան չորս հազար զինծառայողներ և ավելի քան 500 միավոր տեխնիկա:
Տաթև Ֆռանգյան
