ՌԴ որոշ մարզերում լոքդաուն է հայտարարվել

Ռուսաստանի վեց շրջաններում՝ Վորոնեժի, Նիժնի Նովգորոդի, Նովգորոդի, Կուրսկի, Սամարայի մարզերում և Պերմի երկրամասում, այսօրվանից սկսվել են ոչ աշխատանքային օրերը, գրում է DW-ի ռուսական ծառայությունը:

Դրանք սահմանվել են մարզային իշխանությունների կողմից՝ կորոնավիրուսի տարածումը կանխելու նպատակով։ ՌԴ այս սուբյեկտներում ոչ աշխատանքային օրերը չեն համընկնում դաշնային ոչ աշխատանքային օրերի հետ, որոնք սահմանվել են հոկտեմբերի 30-ից նոյեմբերի 7-ը: Մի շարք այլ շրջաններում դրանք նույնպես կսկսվեն ավելի վաղ․ Հյուսիսային Օսիայում՝ հոկտեմբերի 26-ից, Սարատովի մարզում՝ 27-ից, Մոսկվայում և Մոսկվայի մարզում՝ 28-ից։

ՌԴ նախագահ Վլադիմիր Պուտինը մարզերի ղեկավարներին հնարավորություն է տվել լրացուցիչ ոչ աշխատանքային օրեր սահմանել ըստ իրենց հայեցողության՝ տեղում իրավիճակից ելնելով։ Նա չի բացառել, որ Ռուսաստանի որոշ սուբյեկտներում դրանք կարող են տևել նաևւ նոյեմբերի 7-ից հետո։

Ռուսաստանը թարմացրել է COVID-19-ով վարակվածների ցուցանիշի առավելագույնը․ այն մոտենում է 38 հազարի։ Այս մասին ասված է օպերատիվ շտաբի հաղորդագրության մեջ։

«Վերջին մեկ օրվա ընթացքում Ռուսաստանի 85 մարզերում հաստատվել է նոր կորոնավիրուսային վարակի (COVID-19)  37,930 դեպք, այդ թվում 3387-ը (9%-ը)՝ առանց կլինիկական դրսևորումների»,- ասվում է հաղորդագրության մեջ:

Նախորդ ռեկորդը գրանցվել էր հոկտեմբերի 23-ին (37,678), իսկ երեկ հայտնաբերվել է վարակի 35,660 նոր դեպք։ Աճի տեմպը 0.43-ից հասել է 0.46%-ի:

Տաթև Ֆռանգյան