Պուտինի նոր ցանկությունը. ինչ վտանգներ է այն պարունակում Հայաստանի համար․ ՏԵՍԱՆՅՈւԹ

Երևանում Հայաստանի իշխանությունների նկատմամբ լոյալ վերաբերմունք ունեցող քաղաքագետներն ու փորձագետները Վլադիմիր Պուտինի՝ նախորդ օրվա հայտարարությունները հայկական կողմի համար ոչ շահավետ են համարում:

Ռուսաստանի նախագահը, խոսելով Հայաստանի և Արդրբեջանի միջև իրականացվող դեմարկացիայի և դելիմիտացիայի գործընթացից, կարևորել է ռուսական կողմի դերն ու շեշտել՝ առանց ռուսական կողմի մասնակցության ոչինչ հնարավոր չէ անել, քանի որ խորհրդային սահմանների քարտեզները գտնվում են Ռուսաստանի զինված ուժերի ԳՇ-ում:

Քաղաքագետ Լևոն Շիրինյանը սահմանային իրավիճակի կարգավորման վերաբերյալ Պուտինի առաջարկը որակում է 2+1 ձևաչափ, ըստ նրա՝ Ռուսաստանն ու Ադրբեջանը միավորվում են Հայաստանի դեմ: Պուտինի առաջարկած տարբերակը սահմանազատման գործընթացից դուրս է թողնում նաև Իրանին ու Արևմուտքին:

Լևոն Շիրինյանից հետաքրքրվեցինք՝ արդյո՞ք Արևմուտքը, բացի ֆինասական օգնությունից, պատրաստ է այլ աջակցություն ցուցաբերել Հայաստանին:

«Իսկ Հայաստանը ե՞րբ է դիմել, որ նրանք չեն արել, դիմե՞լ են: Ինչքան հնարավոր է՝ ռուսական ազդեցությունը պետք է թուլացնենք, սա չի նշանակում, որ Ռուսաստանը պետք է դուրս մղվի, այս հավասար քաղաքականություն պետք է վարել»,- ասաց նա:

Պաշտոնական Երևանը պետք է համարժեք հակադարձի Պուտինի ցանկություններին, նշում է քաղաքական վերլուծաբան Ռուբեն Մեհրաբյանը և հույս հայտնում, որ Հայաստանում գիտակցում են՝ Մոսկվան հերթական անգամ ոչ նպաստավոր սցենար է մշակել:

Երևանը որևէ կերպ չի արձագանքել Կրեմլից հնչող ցանկություններին: Հայաստանի արտաքին քաղաքական գերատեսչությունը սեփական նախաձեռնությամբ հայտարարություն չտարածելուց զատ՝ նաև ամբողջ օրվա ընթացքում անպատասխան թողեց մեր հեռախոսազանգերը: Իսկ ահա Փաշինյանի թիմակից պատգամավոր Հրաչյա Հակոբյանը նշում է, որ փոխզիջումները տրամաբանական են:

Սահմանազատման և սահմանագծման գործընթացը, Պուտինի պնդմամբ, չի կարող իրականացվել առանց տարածքային զիջումների: Այնտեղ բաներ կան, որոնք պահանջում են նաև փոխզիջումներ՝ ինչ-որ տեղ մի բան հարթել, ինչ-որ տեղ մի բան փոխանակել, հայտարարել է Պուտինը:

Փոխզիջումը վերաբերում է հայկական կողմին, ասում է Լևոն Շիրինյանը և հավելում, որ ռուս-թուրքական կողմերի ցանկությունը Մեղրիով միջանցք ստանալն է:

Երեկ պաշտոնական Մոսկվան արտգործնախարարության ներկայացուցիչ Մարիա Զախարավոյի շուրթերով մեղադրանքներ է հնչեցրել՝ ուղղված Արևմուտքին: Կրեմլում կարծում են, որ ԱՄՆ-ի գլխավորությամբ արևմտյան մյուս երկրները փորձում են խանգարել «3+3» տարածաշրջանային նախաձեռնությանը: Հիշեցնենք, որ «3+3» նախաձեռնությունը ենթադրում է Հայաստանի, Ադրբեջանի, Վրաստանի, Ռուսաստանի, Իրանի և Թուրքիայի մասնակցությամբ փոխգործակցություն: Այս ձևաչափի նախաձեռնողն Անկարան ու Բաքուն են, որը ողջունվել է Մոսկվայի կողմից:

Մանրամասները՝ տեսանյութում։

Նարեկ Կիրակոսյան