Քաղաքականություն
22.10.2021 | 17:39
ԱՄՆ նախագահ Ջո Բայդենը հայտարարել է, որ Չինաստանի կողմից հարձակման դեպքում Միացյալ Նահանգները կպաշտպանի Թայվանին, գրում է BBC-ի ռուսական ծառայությունը։
Սպիտակ տան խոսնակն ավելի ուշ որոշ ամերիկյան լրատվամիջոցների ասել է, որ նախագահի խոսքերը չեն նշանակում ԱՄՆ արտաքին քաղաքականության փոփոխություն: Միացյալ Նահանգներն օրենք ունի, որի համաձայն՝ պետք է օգնի Թայվանին ինքնապաշտպանության հարցում: Դրանից, սակայն, հստակ պարզ չէ, թե ինչպես կվարվի Միացյալ Նահանգները Թայվանի վրա Չինաստանի հարձակման դեպքում:
Պեկինը դեռևս չի արձագանքել Ջո Բայդենի մեկնաբանություններին։
Աղբյուրի փոխանցմամբ՝ միջոցառումներից մեկի ժամանակ ներկաներից մեկն անդրադարձել է Չինաստանի կողմից գերձայնային հրթիռի փորձարկման վերջին զեկույցներին և հարցրել Բայդենին՝ արդյո՞ք նա կարող է «խոստանալ պաշտպանել Թայվանը» և ինչպես է երկիրն արձագանքում Չինաստանում ռազմական տեխնոլոգիաների զարգացմանը:
Ի պատասխան՝ Բայդենն ասել է․ «Այո՛»։ Նա հավելել է, որ կարիք չկա «անհանգստանալու՝ արդյո՞ք [ԱՄՆ հակառակորդները] կդառնան ավելի հզոր», քանի որ «Չինաստանը, Ռուսաստանը և մնացած աշխարհը գիտեն, որ մենք ունենք ամենահզոր զինված ուժերը համաշխարհային պատմության մեջ»։
Այնուհետ CNN-ի հաղորդավար Անդերսոն Կուպերը կրկին հարցրել է՝ արդյո՞ք Միացյալ Նահանգները կպաշտպանի Թայվանը Չինաստանի կողմից հարձակման դեպքում, ինչին Սպիտակ տան ղեկավարը պատասխանել է. «Այո՛, մենք պարտավորություն ունենք դա անելու»:
Տաթև Ֆռանգյան
