Հասարակություն
28.03.2018 | 15:38
Երևանի ընդհանուր իրավասության դատարանի Շենգավիթի նստավայրում, նախագահող դատավոր Մեսրոպ Մակյանի նախագահությամբ այսօր շարունակվում է «Սասնա ծռեր» խմբի 10 անդամի գործով դատաքննությունը:
Մեղադրողները շարունակում են հրապարակել գրավոր ապացույցները: Այսօրվա նիստում ներկայացվեցին 2016 թվականի հուլիսյան իրադարձությունների ժամանակ սպանված ոստիկանների դիերի փորձաքննության եզրակացության արդյունքները: Ըստ փորձաքննության՝ գնդապետ Արթուր Վանոյանի մահը վրա է հասել փորձաքննությունից 24 ժամ առաջ: Նրա մարմնի վրա առկա են եղել կոտրվածքներ, որոնք պատճառվել են կենդանության օրոք:
Գնդի գրավման ժամանակ հրազենային վիրավորում ստացած և մի քանի օր անց հիվանդանոցում մահացած ենթասպա Գագիկ Մկրտչյանի մահը վրա է հասել կրծքավանդակի և որովայնի շրջանում ստացած հրազենային վնասվածքից:
Ըստ մեղադրողի հրապարակման՝ մյուս սպանված ոստիկանի՝ Յուրի Տեփանոսյանի մարմնի վրա ևս հրազենային վիրավորումից զատ, եղել է նաև սալջարդ։ Տեփանոսյանի մարմնի վրա կենդանության օրոք՝ մահվանից անմիջապես առաջ, սուր եզր ունեցող կույր առարկայով հարված է հասցվել։
Նշենք, որ սպանված ոստիկաններ՝ Արթուր Վանոյանի և Յուրի Տեփանոսյանի սպանության համար մեղադրվում է «Սասնա ծռեր» խմբի անդամ Սմբատ Բարսեղյանը։ Նրան սպառնում է ցմահ ազատազրկում։ Մյուս սպանված ոստիկանի՝ Գագիկ Մկրտչյանի մահվան համար մեղադրվում է «Սասնա ծռեր» խմբի անդամ Արմեն Բիլյանը։
Լիլիթ Շաբոյան
