«Բալասանյան դաշինքը» կոալիցիա կկազմի՞ ՔՊ-ի հետ․ քաղաքական ուժերի արձագանքը

Մի քանի օր է՝ Գյումրիում խոսակցություններ են շրջանառվում, որ ՏԻՄ ընտրություններում ձայների թվով առաջին տեղը զբաղեցնող «Բալասանյան դաշինք»-ը կոալիցա կկազմի երկրորդ տեղ ընկած քաղաքական ուժի՝ «Քաղաքացիական պայմանագիր» կուսակցության հետ՝ քաղաքապետի պաշտոնում առաջադրելով իշխող կուսակցության թեկնածու, Շիրակի մարզպետ Հովհաննես Հարությունյանին։

Մենք այս թեմայի շուրջ Factor.am-ը փորձեց պարզաբանումներ ստանալ «Բալասանյան դաշինք»-ի ավագանու անդամ Սոնա Առաքելյանից։

Նրանից հետաքրքրվեցինք՝ Սամվել Բալասանյանի թիմը կհամաձայնի՞ քաղաքային իշխանության ղեկը հանձնել ընտրություններում առաջատար տեղ չզբաղեցրած քաղաքական ուժին, թե՞ կմերժի այդ տարբերակը ու առաջ կմղի սեփական թեկնածուին՝ Վարդգես Սամսոնյանին։

Սոնա Առաքելյանը նշեց, որ դեռ ներթիմային քննարկումների մեջ են։

«Քանի դեռ Կենտրոնական ընտրական հանձնաժողովի կողմից չեն հրապարակվել վերջնական արդյունքները, սահմանափակվում ենք միայն ներթիմային քննարկմամբ։ Երբ ունեցանք վերջնական արդյունքներն ու մանդատները, այն ժամանակ թիմից դուրս քննարկումներ կանենք»,-ասաց Սոնա Առաքելյանը։

Այս թեմայի շուրջ մեզ հետ զրույցում պարզաբանումներ էր տվել նաև Շիրակի մարզպետ Հովհանես Հարությունյանն՝ ասելով․ ««Մենք այս պահին ոչ մի քաղաքական ուժի հետ ո՛չ խոսել ենք, ո՛չ էլ պատրաստ ենք առաջարկներ քննարկելու։ Մենք սպասում ենք Կենտրոնական ընտրական հանձնաժողովի պաշտոնական տվյալների հրապարակմանը, դրանից հետո գուցե կլինեն առաջարկություններ, մենք կքննարկենք դրանք»,-ասել էր մարզպետը։ Նա չէր բացառել իր քաղաքապետ ընտրվելը։

Գյումրու ՏԻՄ ընտրություններում 10,6 տոկոս ձայն հավաքած, երրորդ տեղը զբաղեցնող քաղաքական ուժը՝ «Զարթոնք» կուսակցության քաղաքապետի թեկնածու, ԱԱԾ-ի նախկին աշխատակից, պահեստազորային սպա, փոխգնդապետ
Վարդևան Հակոբյանն էլ հայտարարել էր, որ հանուն Գյումրու զարգացման պատրաստ է համագործակցել ավագանու կազմում ընդգրկվող բոլոր քաղաքական ուժերի հետ։

«Իմ համար ամենակարևորը քաղաքի խնդիրների լուծումն է, ես քաղաքական մարդ չեմ, և այդ սկզբունքով եմ մասնակցել ընտրությունների։ Քաղաքի կառուցման համար ես պատրաստ եմ բոլորի հետ աշխատել»,-ասել էր թեկնածուն։

ՀՀԿ-ի ավագանու ցուցակը գլխավորող Արտյոմ Ղուկասյանը հայտնել էր, որ ՔՊ-ի հետ համագործակցությունը բացառում են, իրենք մնում են որպես արմատական ընդդիմադիր ուժ, իսկ մյուս քաղաքական ուժերի հետ համագործակցության հարց չեն քննարկել։

«Ապրելու երկիր» կուսակցության քաղաքապետի թեկնածու Կարեն Մալխասյանն էլ մեզ հետ ունեցած զրույցում տեղեկացրեց, որ իրենք ոչ մի ուժի հետ չեն համագործակցելու։

Հիշեցնենք՝ նախնական տվյալներով Գյումրու ավագանու կազմում կլինեն 5 քաղաքական ուժեր առաջին տեղում «Բալասանյան դաշինք» սոցիալական կուսակցությունն է, որը ստացել է ձայների 36,59 տոկոսը, երկրորդ տեղում «Քաղաքացիական պայմանագիր» կուսակցությունը, որը հավաքել է 29,56 տոկոս։

3-րդ տեղում «Զարթոնք» կուսակցությունն է՝ 10,6 տոկոս, 4-րդ տեղում «Ապրելու երկիր» կուսակցությունն է՝ 5,65 տոկոս,իսկ 5-րդ տեղում ՀՀԿ-ն է՝ 5,06 տոկոս։

Նախնական հաշվարկներով, «Բալասանյան դաշինք» սոցիալական կուսակցությունը կստանա 14 մանդատ, ՔՊ-ն՝ 11, «Զարթոնքը»՝ 4, «Ապրելու երկիր» և «Հայաստանի Հանրապետական» կուսակցությունները՝ 2-ական մանդատ։

Արմիկ Մովսիսյան