09.06.2026 | 00:17
Մարկո Ռուբիոն շնորհավորել է Փաշինյանին
Թուրքիան գնալով ավելի է հեռանում ժողովրդավարությունից․ իրավիճակը վատթարանում է․ զեկույց
Քաղաքականություն
20.10.2021 | 16:57
Թուրքիան գնալով ավելի է հեռանում ժողովրդավարությունից․ երկրում օրենքի գերակայությանը, արդարադատությանը և մարդու հիմնարար իրավունքներին հետևելու հետ կապված իրավիճակը շարունակում է վատթարանալ։ Այս մասին ասվում է Եվրոպական հանձնաժողովի նոր զեկույցում, գրում է DW-ի ռուսական ծառայությունը։
Եվրամիությանն անդամակցելու ճանապարհին Թուրքիայի առաջընթացը գնահատող փաստաթղթի հեղինակները քննադատել են այն փաստը, որ Թուրքիայի իշխանությունների հատուկ լիազորությունները, որոնք սահմանվել են 2016 թվականի հեղաշրջման փորձից հետո, դեռևս ուժի մեջ են: Քաղաքացիական հասարակության և ընդդիմադիր քաղաքական գործիչների նկատմամբ ճնշումները չեն դադարում, նշվում է զեկույցում:
Այս շաբաթվա սկզբին Անկարայում ԱՄՆ դեսպանատունը և ինը այլ երկրների դիվանագիտական ներկայացուցչություններ կոչ արեցին Թուրքիային ազատ արձակել մարդու իրավունքների պաշտպան Օսման Քավալային, որը բանտում է 2017 թվականից՝ չնայած դատավճռի բացակայությանը: Դրանից հետո բոլոր տասը երկրների դեսպանները հոկտեմբերի 19-ին կանչվեցին Թուրքիայի ԱԳՆ:
Ի պատասխան հրապարակված զեկույցի՝ Թուրքիայի ԱԳՆ-ն հայտարարեց, թե զեկույցը «հիմնավորված չէ» և «անարդարացի քննադատություն է», որի հետ Անկարան համաձայն չէ։ Թուրքիայի ԱԳՆ-ի գնահատմամբ՝ այս փաստաթուղթը ցուցադրում է «Թուրքիայի հանդեպ ԵՄ երկակի ստանդարտները»։
Տաթև Ֆռանգյան
