Քաղաքականություն
20.10.2021 | 14:32
Թուրքիայի նախագահ Ռեջեփ Թայիփ Էրդողանը հայտարարել է, թե ՄԱԿ-ի գործող համակարգը, որում իսլամական աշխարհը չունի ձայնի իրավունք, իսկ Աֆրիկայի, Լատինական Ամերիկայի, Հարավային Ասիայի երկրների շահերն անտեսվում են, անհեռանկարային է։ «Անադոլու» գործակալության փոխանցմամբ՝ Էրդողանն այս մասին ասել է TRT World Forum 2021-ի մասնակիցներին հղած տեսաուղերձում։
Թուրքիայի նախագահը նշել է, որ դեռ երբեք համաշխարհային համակարգում խնդիրները չեն եղել այսքան սուր և ակնհայտ։ Ըստ նրա՝ միջազգային կառույցները, որոնց առաքելությունը խաղաղության համար պայքարն ու անվտանգության ապահովումն է, ձախողել են բոլոր հնարավոր քննությունները ներկա մարտահրավերների վերացման հարցում։
Էրդողանը խոսել է նաև համավարակի մասին՝ ընդգծելով, որ դրանից հետո աշխարհը չի լինի այնպիսին, ինչպիսին նախկինում էր։ Նա նշել է, որ տնտեսական իրավիճակի վատթարացման ֆոնին, իբր, Արևմուտքում ավելացել է այլատյացության հողի վրա հանցագործությունների թիվը։ Էրդողանը խոսել է նաև իսլամաֆոբիայի դեմ պայքարի կարևորության մասին։
Էմմա Չոբանյան
