Քաղաքականություն
20.10.2021 | 13:00
Ադրբեջանի պետական անվտանգության ծառայության պետ, գերիների, պատանդների և անհետ կորածների պետական հանձնաժողովի նախագահ Ալի Նագիևը նախօրեին ընդունել է Կարմիր Խաչի միջազգային կոմիտեի փոխնախագահ Ժիլ Կարբոնյեի գլխավորած պատվիրակությանը։ Այս մասին հաղորդում են ադրբեջանական լրատվամիջոցները՝ հղում կատարելով պետանվտանգության ծառայությանը։
Հանդիպմանը քննարկվել են ԿԽՄԿ-ի ու Ադրբեջանի կապերը, ինչպես նաև կազմակերպության կողմից իրականացվող հումանիտար առաքելության վերաբերյալ փոխադարձ հետաքրքրություն ներկայացնող հարցեր։
Անդրադառնալով Արցախյան երկու պատերազմների ընթացքում անհետ կորած Ադրբեջանի քաղաքացիների որոնումներին՝ Նագիևը հույս է հայտնել, որ կազմակերպությունը հետագայում էլ այդ հարցում ակտիվ դերակատարում և ներդրում կունենա։
Անդրադառնալով կազմակերպության ներկայացուցիչների Արցախ այցերին՝ Նագիևը հայտարարել է, որ դրանք հնարավոր են Ադրբեջանի տարածքի օգտագործմամբ, և ոչ թե Հայաստանի։
Այսպիսով, Ադրբեջանը ամեն կերպ փորձում է խոչընդոտել Արցախի հայերի՝ հումանիտար օգնություն ստանալու իրավունքին և արգելափակել այն։
Հավելենք, որ Կարմիր Խաչը միջազգային միակ կազմակերպությունն է, որն Արցախում գրասենյակ ունի։
Էմմա Չոբանյան
