Տագնապալի վիճակագրություն․ նոր շտամ Մեծ Բրիտանիայում և գերբեռնված հիվանդանոցներ

Մեծ Բրիտանիայում COVID-19-ով վարակման դեպքերն աճում են՝ վերջին շաբաթվա ընթացքում աճելով 16%-ով: Փորձագետները նշում են, որ դա կարող է պայմանավորված լինել կորոնավիրուսի նոր շտամի տարածմամբ: AY.4.2 շտամը հայտնաբերվել է դեռևս հուլիսին, և հիմա այն կազմում է բոլոր նոր վարակների մոտ 6%-ը:

Մեկ օրում մահացել է 223 հիվանդ․ սա առավելագույն ցուցանիշն է այս տարվա մարտից ի վեր: Այնուամենայնիվ, Մեծ Բրիտանիայի իշխանությունները դեռ չեն ծրագրում սանիտարական նոր սահմանափակումներ մտցնել, հայտնում է Euronews-ը։

Վարակման դեպքերի թիվն աճում է նաև ՌԴ բոլոր մարզերում։ Մոսկվայում վիրուսով վարակման դեպքերը, օգոստոսի համեմատ, աճել են 4 անգամ, ծանր ընթացքով վարակակիրների թիվը կրկնակի մեծացել է։

«Հիվանդների մեծ մասը, որոնք վերակենդանացման բաժանմունքներում են հայտնվում ծանր վիճակում, պատվաստված չեն։ Երբեմն հուսահատության զգացում է առաջանում, քանի որ շատ հեշտ կլիներ կանխել հիվանդության ծանր ընթացքը, եթե անձը պատվաստված լիներ»,- ասել է Մոսկվայից վերակենդանացման բաժանմունքի բժիշկ Գիորգի Արբոլիշվիլին:

Իտալիայում ամեն օր ցույցեր են անցկացվում կորոնավիրուսային վկայականների ներդրման դեմ: Տրիեստի նավահանգստում ոստիկանները ջրցան մեքենաներ են կիրառել երկրի բոլոր ծայրերից հավաքված ցուցարարներին ցրելու համար: Ակցիայի մասնակիցները չորս օրով արգելափակել էին նավահանգստի դարպասները։

Իռլանդիայում, երկար ժամանակ կիրառված սահմանափակումներից հետո, բացվում են գիշերային ակումբները, սակայն երկրի իշխանությունները վերանայել են շատ սանիտարական նորմերի չեղարկումը՝ հոսպիտալացվածների թվի ավելացման և հիվանդանոցների գերբեռնվածության պատճառով։

Տաթև Ֆռանգյան