23.08.2026 | 14:26
Վթարային ջրանջատում Երևանում
ԵՄ-ն պատրաստ է ներդրում ունենալ տարածաշրջանում կայունության ու խաղաղության ամրապնդման գործում․ Տոյվո Կլաարը՝ Ալիևին
Քաղաքականություն
19.10.2021 | 14:31
Ադրբեջանի նախագահ Իլհամ Ալիևը հանդիպել է Հարավային Կովկասի հարցերով ԵՄ հատուկ ներկայացուցիչ Տոյվո Կլաարի հետ։ Այս մասին հայտնում են ադրբեջանական լրատվամիջոցները՝ վկայակոչելով նախագահի աշխատակազմի հաղորդագրությունը։
Հաղորդվում է, որ կողմերը քննարկել են Ադրբեջանի և ԵՄ-ի միջև համագործակցության զարգացման հեռանկարները։ Կլաարը նշել է, որ ԵՄ-ն պատրաստ է ներդրում ունենալ տարածաշրջանում կայունության ու խաղաղության ամրապնդման և վստահության մթնոլորտի ստեղծման գործում։
Նշվել է նաև, որ Բրյուսելը մեծ նշանակություն է տալիս Բաքվի հետ համագործակցության զարգացմանը, և որ Ադրբեջանը ԵՄ-ի համար հուսալի գործընկեր է։ Բացի այդ, ըստ ադրբեջանական կողմի, Կլաարը նշել է, որ Ալիևի հանդիպումը ԵՄ Խորհրդի նախագահ Շառլ Միշելի հետ նոր ներդրում է ունեցել ԵՄ-ի և Ադրբեջանի հարաբերությունների զարգացման գործում։
Հանդիպմանը կողմերը կարծիքներ են փոխանակել նաև Արևելյան գործընկերության երկրների առաջիկա գագաթնաժողովի վերաբերյալ։
Նշենք, որ Տոյվո Կլաարն այցելելու է նաև Հայաստան և Վրաստան։
Էմմա Չոբանյան
