11.10.2026 | 10:00
Նորբերտո Բրիասկո Բալեկյանն առաջին դուբլն է գրանցել կարիերայում. ՏԵՍԱՆՅՈՒԹ
Բժիշկները Չեխիայի նախագահին անգործունակ են ճանաչել
Քաղաքականություն
19.10.2021 | 13:49
Չեխիայի նախագահ Միլոշ Զեմանը չի կարող կատարել իր պարտականությունները առողջական խնդիրների պատճառով։ Այս մասին հայտարարել է երկրի Սենատի նախագահ Միլոշ Վիստրչիլը: Նա վկայակոչել է Պրահայի զինվորական համալսարանական հիվանդանոցի եզրակացությանը, որտեղ Զեմանը բուժում է ստանում մոտ երկու շաբաթ, գրում է DW-ի ռուսական ծառայությունը:
Զեմանի առողջական վիճակի վերաբերյալ երկարաժամկետ կանխատեսումը «ծայրահեղ անորոշ» է, և առաջիկա շաբաթներին նրա աշխատանքի վերադառնալը «քիչ հավանական է», ասել է Չեխիայի Սենատի ղեկավարը:
Հոկտեմբերի 10-ին ինտենսիվ թերապիայի բաժանմունք ընդունված 77-ամյա Զեմանի ճշգրիտ ախտորոշումը չի բացահայտվում, սակայն չեխական ԶԼՄ-ները գրում են, որ հոսպիտալացումը կարող է կապված լինել լյարդի խնդիրների սրման հետ: Երկրի ղեկավարը տառապում է շաքարախտով, նա տեղաշարժվում է սայլակով:
Նախագահի պարտականությունները Չեխիայում հիմնականում արարողակարգային բնույթ են կրում: Այնուամենայնիվ, Զեմանի հոսպիտալացումը տեղի է ունեցել քաղաքական կարևոր պահի․ նախագահի բացակայությունը խոչընդոտում է նոր կառավարության ձևավորմանը:
Այժմ խորհրդարանը պետք է որոշի նախագահի լիազորությունները պետության այլ ներկայացուցչի փոխանցելու հարցը, ինչպես նախատեսված է Սահմանադրությամբ:
Տաթև Ֆռանգյան
