Նիստ չի հրավիրվել, կանոնակարգի խախտում է եղել․ Ղազինյան․ ՏԵՍԱՆՅՈՒԹ

ԱԺ անվտանգության և պաշտպանության հարցերի մշտական հանձնաժողովի այսօրվա նիստում, ի թիվս օրակարգային այլ հարցերի, կրկին քննակվում է հանձնաժողովի փոխնախագահի ընտրության հարցը: «Հայաստան» խմբակցությունը 8-րդ անգամ այս պաշտոնին առաջադրել է Արթուր Ղազինյանի թեկնածությունը:

Թեկնածուն նշեց, որ իր ներկայությունը նիստին պայմանավորված է մի հանգամանքով, որ օրակարգում ներառված են բովանդակային աշխատանքային քննարկում ենթադրող հարցեր. «Հետևաբար, օրակարգի առաջին հարցը, ինչպես արդեն նշել եմ 5-6 անգամ, մեզ համար քննարկման ենթակա հարց չի հանդիսանում: Կարծում եմ՝ պետք է արագ ընթացակարգ ապահովենք, հարցին լուծում տանք և անցնենք բովանդակային հարցերին»:

Ղազինյանը նշեց, որ ընդդիմադիր պատգամավորները ¼-վ հանձնաժողովի արտահերթ նիստ գումարելու առաջարկով են հանդես եկել, սակայն նիստ չի գումարվել. «Դա կանոնակարգի խախտում է և ինչ-որ ձևով պետք է գնահատականի արժանանա»:

Ղազինյանն ընդգծեց, որ իշխանությունը չի կարող ստիպել ընդդիմությանը փոխելու իր թեկնածուին, ինչքան էլ, որ նա իշխանության սրտում տեղ չունի, ցանկություն չկա նրա օգտին քվեարկելու: «Քաղաքական պայքար է: Մենք ունենք թեկնածու, դուք ունեք առարկություն այդ թեկնածուի համար: Հետևաբար, մեր իրավունքն է ներկայացնել թեկնածուին, ձեր իրավունքն է մերժել թեկնածուին»,- ասաց պատգամավորը և հավելեց, որ հրաժարվում է հարցերին պատասխանելուց և եզրափակիչ ելույթից, որ արագ անցնեն օրակարգային մյուս հարցերի քննարկմանը:

Մանրամասները՝ տեսանյութում: