Թուրքիան ԱՄՆ-ի և եվրոպական մի շարք երկրների դեսպաններին մեղադրել է երկրի դատական գործերին միջամտելու մեջ

Թուրքիայի փոխնախագահ Ֆուաթ Օքթայը Անկարայում տասը երկրների դեսպաններին մեղադրել է իրենց լիազորությունները գերազանցելու և երկրի դատական գործերին միջամտելու մեջ:

Կանադայի, Ֆրանսիայի, Ֆինլանդիայի, Դանիայի, Գերմանիայի, Նիդերլանդների, Նոր Զելանդիայի, Նորվեգիայի, Շվեդիայի և ԱՄՆ-ի դեսպանները կոչ էին արել ազատ արձակել մարդու իրավունքների պաշտպան Օսման Քավալային: Ավելի ուշ նրանք բոլորը կանչվել են Թուրքիայի ԱԳՆ:

«Որոշ երկրների դեսպաններ, որոնք պետք է հարգանք ցուցաբերեին այն երկրի անկախության, ինչպես նաև դատական իշխանության անկախության նկատմամբ, որտեղ գործում են, գերազանցել են իրենց լիազորությունները և դատական գործերին քաղաքական միջամտության կոչ են արել: Թուրքիայի դատարաններն անկախ են, իսկ Թուրքիան լիովին անկախ երկիր է: Նրանք, ովքեր ցանկանում են միջամտել դատական գործընթացներին, կարող են շարունակել իրենց երկրներում նման ցանկությունների իրականացումը»,- Օքթայի խոսքերն է մեջբերում «Սպուտնիկը»:

Հավելենք, որ Օսման Քավալան Anadolu Kültür AŞ մշակութային հիմնադրամի հիմնադիրն է, որը, մասնավորապես, աջակցում է էթնիկ և կրոնական փոքրամասնությունների նախագծերին՝ միջազգային շեշտադրմամբ: Անցյալ տարվա փետրվարին դատարանը նրան արդարացրեց 2013 թվականին իշխանությունը տապալելու փորձին մասնակցելու գործով, սակայն Ստամբուլի դատախազությունը ձերբակալման նոր հրահանգ տվեց: Այս անգամ նրան մեղադրանք է առաջադրվել 2016 թվականի հուլիսին Թուրքիայում հեղաշրջման փորձին մասնակցելու համար:

Տաթև Ֆռանգյան