Քաղաքականություն
18.10.2021 | 21:43
Թուրքիան կարող է «ակտիվ դերակատարում ունենալ Աֆղանստանում ներդրումների, որոշ ծրագրերի իրագործման, երկրի վերականգնման գործում։ Այս մասին հայտարարել է «Թալիբան»-ի ներկայացուցիչ, Աֆղանստանի գործող ԱԳ նախարար Ամիր Խան Մութթաքին թուրքական «Անադոլու» գործակալության հետ զրույցում։
Նա նշել է, որ իրենց կառավարության պաշտոնական ճանաչումն ու միջազգային օգնությունը կարևոր նշանակություն ունեն երկրի տնտեսության վերականգնման գործում։
Ըստ պաշտոնյայի՝ «Թալիբան»-ի կողմից իշխանության գրավումից հետո միջոցների սառեցումը խախտում է միջազգային իրավունքն ու մարդու իրավունքները։
«Իրական հարցն այն է՝ ինչո՞ւ են այդ գումարներն արգելափակվել, ի՞նչ են արել Աֆղանստանի քաղաքացիները։ Մի կողմից ԱՄՆ-ը և մյուս երկրներն ասում են, որ Աֆղանստանին պետք է տրվի հումանիտար օգնություն և մարդու իրավունքները պետք է հարգվեն, բայց նրանք թողնում են Աֆղանստանի մոտ 40 մլն բնակչությանն առանց առաջին անհրաժեշտության ապրանքների»,- ասել է Մութթաքին՝ նշելով, որ այդ հարցերն առաջին պլան են մղվել Թուրքիայի իշխանության ներկայացուցիչների հետ համատեղ մամուլի ասուլիսում։
Նշենք, որ Մութթաքին գլխավորում էր օրերս Թուրքիա այցելած «Թալիբան»-ի բարձրաստիճան պատվիրակությունը։ Նրանց ընդունել և բանակցություններ է անցկացրել Թուրքիայի ԱԳ նախարար Մևլութ Չավուշօղլուն։
Էմմա Չոբանյան
