19.11.2024 | 16:35
Գամփռին դաժան վերաբերմունքի են արժանացրել․ պահանջում ենք պաշտպանել կենդանիների իրավունքները․ ՏԵՍԱՆՅՈՒԹ
ՀՀ կառավարության առջև ծառացած մարտահրավերները շատ են, մենք պատրաստակամ ենք աջակցել այնքան, որքան կարող ենք. Անդրեա Վիկտորին
Քաղաքականություն
18.10.2021 | 17:49
Նարեկ Մկրտչյանը Անդրեա Վիկտորինի հետ հանդիպմանը կարևորել է Հայաստան-ԵՄ ինդիկատիվ ծրագրի մշակումը
Աշխատանքի և սոցիալական հարցերի նախարար Նարեկ Մկրտչյանն այսօր ընդունել է ՀՀ-ում Եվրոպական միության պատվիրակության ղեկավար, դեսպան Անդրեա Վիկտորինին. տեղեկացնում են գերատեսչությունից:
«Բարձր գնահատելով ԵՄ հետ համագործակցությունը՝ Նարեկ Մկրտչյանը վերահաստատել է համագործակցության շրջանակն ընդլայնելու պատրաստակամությունը՝ համատեղ իրականացվելիք ծրագրերն առավել արդյունավետ և թիրախային դարձնելու համար։
Անդրադառնալով համագործակցության հիմնական և ծրագրային ուղղություններին՝ նախարարը կարևորել է հետպատերազմական և կորոնավիրուսային իրավիճակում սոցիալական-տնտեսական հետևանքների չեզոքացմանն ուղղված Հայաստան-ԵՄ ինդիկատիվ ծրագրի մշակումը։
Նարեկ Մկրտչյանի խոսքով՝ նախարարությունն ակտիվորեն մասնակցում է փաստաթղթի մշակման աշխատանքներին և առաջնահերթությունների նախանշման գործընթացին՝ հատկապես խոցելի խմբերի, կանանց, հաշմանդամություն ունեցող անձանց իրավունքների բարելավման ուղղություններով։
«ԵՄ հետ համագործակցության շրջանակում կարևորում ենք նաև կանանց և աղջիկների հզորացմանը վերաբերող ծրագրերը։ Ըստ էության, սա նաև մեր ժողովրդագրական քաղաքականության կարևոր բաղադրիչներից է, և մենք շարունակում ենք տարբեր ծրագրերի միջոցով նպաստել կանանց առաջնորդության խթանմանը»,- նշել է նախարարը։
Անդրեա Վիկտորինը ևս, բարձր գնահատելով համատեղ իրականացված ծրագրերի ընթացքն ու արդյունքները, պատրաստակամություն է հայտնել շարունակել անհրաժեշտ ջանքերի ներդրումը սոցիալական պաշտպանության ոլորտի զարգացման գործում․ «Ցանկալի առաջընթաց ունենալու համար մենք պետք է որպես հիմք ընդունենք հաջողված օրինակները և զարգացնենք դրանք։ Արձանագրելով, որ հետպատերազմական շրջանում և կորոնավիրուսային համավարակի դեմ պայքարում ՀՀ կառավարության առջև ծառացած մարտահրավերները շատ են՝ մենք պատրաստակամ ենք աջակցել այնքան, որքան կարող ենք»։
Հանդիպման ավարտին պայմանավորվածություն է ձեռք բերվել քննարկված ծրագրերի շուրջ շարունակել ակտիվ աշխատանքներ իրականացնել»,- ասված է հաղորդագրությունում:
