Քաղաքականություն
18.10.2021 | 20:50
Իսպանիայի վարչապետ Պեդրո Սանչեսը կոչ է արել վերացնել միապետի անձեռնմխելիությունը, որն ամրագրված է երկրի Սահմանադրությամբ: Վարչապետն այս մասին հայտարարել է Cadena SER ռադիոկայանին տված հարցազրույցում:
«Կարծում եմ, որ պետության ղեկավարի նկատմամբ այս կարգավիճակը ճանաչելու կարիք չկա։ Ըստ իս՝ սա այլ դարաշրջանի մնացորդ է, մեր ժողովրդավարության մեկ այլ լեգիտիմ փուլի»,- ասել է նա:
Իսպանիայի Սահմանադրության 56.3 հոդվածում ասվում է, որ «թագավորի անձը անձեռնմխելի է, նա ենթակա չէ պատասխանատվության»: Ավելի վաղ վարչապետը չէր բացառել երկրի հիմնական օրենքում փոփոխություններ կատարելու հնարավորությունը՝ միապետի անձեռնմխելիությունը սահմանափակելու նպատակով:
Հայտարարությունները հնչել են 2014 թվականին Իսպանիայի գահից հրաժարված Խուան Կառլոս I-ի հետ կապված սկանդալի ֆոնին: Թեև նախկին թագավորին Իսպանիայում որևէ մեղադրանք չի առաջադրվել, երկրում շարունակվում են մի քանի հետաքննություններ, որոնք առնչվում են նրա գործունեությանը:
Տաթև Ֆռանգյան
