ԵՐԵՎԱՆԻ ԺԱՄԱՆԱԿՈՎ․ Արվեստը կարող է հանել մեզ ճգնաժամից, բայց այսօր հենց ինքն է ճգնաժամի մեջ. Գիսանե Պալյան

«Արվեստը կարող է հանել մեր ժողովրդին ճգնաժամից, բայց այսօր հենց ինքն է ճգնաժամի մեջ: Հետպատերազմյան շրջանում մեզ համար կրիտիկական շրջան է, բայց պետք է գիտակցենք, որ պարտությունը դատավճիռ չէ. եթե պարտվել ենք, չի նշանակում, որ հանձնվել ենք: Սա սխալները վերլուծելու և նոր հաղթանակի սկիզբ կարող է լինել: Պետք է մոբիլիզացնենք մեր ուժերը»,- Factor.am-ի հետ զրույցում նման տեսակետ է հայտնում «Էմփիրեյ» ռոք խմբի ստեղնահար, երգահան Գիսանե Պալյանը:

Նա ինքն իրեն դասում է արվեստի այն մարդկանց շարքին, որոնք երկրի համար վճռորոշ պահերին արտահայտում են իրենց տեսակետը.

«Հետպատերազմյան շրջանում չեմ արտահայտվել, որովհետև ասելիք չունեի, ինքս լիարժեք կերպով չեմ հասկանում մի շարք հարցեր, միայն հասկանում եմ, որ պետք է դուրս գալ անորոշ այս իրավիճակից: Պատերազմից հետո եղավ ոչ թե հիասթափության, այլ ունեցա հուսահատության պահեր: Գիտե՞ք` հոգնել եմ միայն խոսքեր լսելուց: Չեմ կարողանում հայրենասիրական երգեր լսել, որովհետև ուզում եմ խոսքից բացի նաև գործ տեսնել»:

Գիսանե Պալյանը խոստովանում է, որ վերջին երեք տարում արվեստի մարդկանց միջև ևս եղան բևեռվածություններ.

«Մի շրջան դա բավական զգալի էր, բայց հետո շատերս հասկացանք, որ պետք չէր հակադարձել միմյանց: Իհարկե, ամեն մարդ կարող է ունենալ իր կարծիքը, բայց պետք է հարգի նաև դիմացինի կարծիքը, պետք չէ թշնամանալ իրար հետ: Հիմա ամենաշատը հենց այդ բևեռվածությունից է հարկավոր խուսափել: Այնուամենայնիվ, հավատում եմ, որ ամեն բան լավ է լինելու»:

Մանրամասները` տեսանյութում:

Աննա Բաբաջանյան