Քաղաքականություն
15.10.2021 | 21:40
Բրյուսելում շարունակվում են աշխատանքները Բելառուսի իշխող վարչակարգի դեմ նոր սահմանափակող միջոցառումների ուղղությամբ: Այս մասին DW- ին հայտնել է ԵՄ բարձրաստիճան պաշտոնյան՝ անանունության պայմանով:
«Մենք աշխատում ենք պատժամիջոցների հինգերորդ փաթեթի վրա, որը, ես ակնկալում եմ, կարող է ընդունվել նոյեմբերին», – մանրամասնել է նա:
Լրատվականը նշում է, որ Բրյուսելի պաշտոնյաները պատժամիջոցներ են նախապատրաստում ԵՄ երկրների ներկայացուցիչների հետ միասին, սակայն դրանց ընդունումը ԵՄ բոլոր 27 երկրների քաղաքական որոշումն է, ուստի՝ Բրյուսելը չի կարող հստակ կանխատեսել սահմանափակող միջոցների նոր փաթեթի հաստատման ժամկետները:
Անցյալ տարվա օգոստոսին Արևմուտքի կողմից չճանաչված Բելառուսի նախագահական ընտրություններից հետո Եվրամիությունն Ալեքսանդր Լուկաշենկոյի ռեժիմի դեմ անհատական պատժամիջոցների չորս փաթեթ է սահմանել:
Դրանցից երեքը կիրառվել են անցյալ տարի, չորրորդը` այս տարվա հունիսին: Արդյունքում ՝ այժմ պատժամիջոցների ցուցակում 166 անձ կա, այդ թվում՝ ինքը Լուկաշենկոն, ինչպես նաև` 15 հաստատություն և ձեռնարկություն:
Տաթև Ֆռանգյան
