19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Գնել Սանոսյանը ծանոթացել է «Իրան-Հայաստան 400 կՎ երրորդ էլեկտրահաղորդման գիծ և համապատասխան ենթակայան» օբյեկտի շինարարության ընթացքին
Տնտեսություն
14.10.2021 | 14:33
ՀՀ տարածքային կառավարման և ենթակառուցվածքների նախարար Գնել Սանոսյանը Սյունիքի մարզ կատարած աշխատանքային այցի շրջանակներում շրջայց է կատարել «Ագարակ-2», «Շինուհայր» և «Նորավան» ենթակայաններում. տեղեկացնում են գերատեսչությունից:
«Նախարարը տեղում ծանոթացել է «Բարձրավոլտ էլեկտրացանցեր» ՓԲԸ կողմից իրականացվող «Իրան-Հայաստան 400 կՎ երրորդ էլեկտրահաղորդման գիծ և համապատասխան ենթակայան» օբյեկտի շինարարության ծրագրի և «Ագարակ-2», «Շինուհայր» ենթակայանների վերակառուցման ընթացքին առնչվող մանրամասներին, ընթացիկ խնդիրներին, պայմանագրերով ստանձնած պարտավորությունների կատարմանը:
ԲԷՑ ՓԲԸ ներկայացուցիչները նախարարին են ներկայացրել կատարվող աշխատանքների ընթացքը, մասնավորապես.
«Նորավան» ենթակայանում գրեթե ավարտվել են բարձր լարման սարքավորումների հիմքերի և 220 կՎ ԲԲՍ հատվածի մալուխային խրամուղիների բետոնացման, շենք-շինությունների և սարքավորումների կոնստրուկցիաների մոնտաժման աշխատանքները, տեղադրվել են ուժային սարքավորումները, 2 ավտոտրանսֆորմատորները, իրականացվել են շուրջ 50 կմ հաղորդալարերի մոնտաժման և լարաձգման աշխատանքներ, ընթացքում է պաշտպանության և ավտոմատիկայի սարքավորումների ներմուծումը:
Իրատեսական է համարվել 2022-2023թթ ընթացքում հաղորդալարերի մոնտաժման և սարքավորումների տեղադրման ամբողջությամբ իրականացումը:
Ներկայումս «Ագարակ-2», «Շինուհայր» ենթակայանների վերակառուցման աշխատանքներն ընթանում են ընկերության սեփական միջոցներով:
«Ագարակ-2», «Շինուհայր» ենթակայանների վերակառուցման նպատակով հայտարարված ենթակայանների վերակառուցման նախագծերի ճշգրտման և նախահաշվային փաստաթղթերի կազմման խորհրդատվական ծառայությունների գնման մրցույթի արդյունքում ընկերությունը ստացել է հաղթող ընկերության կողմից ներկայացված՝ ենթակայանների վերակառուցման նախագծերի և նախահաշվային փաստաթղթերի փորձաքննության վերաբերյալ դրական եզրակացություն:
Նախատեսվում է ներկայացված փաստաթղթերի հիման վրա 2021թ. 4-րդ եռամսյակում հայտարարել կապալառուների ընտրության մրցույթ և 2021թ. վերջին ամփոփել մրցույթի արդյունքները: Ակնկալվում է «Ագարակ-2» ենթակայանում վերակառուցման աշխատանքներն ավարտել 2023թ. ապրիլին, իսկ «Շինուհայր» ենթակայանում՝ 2023թ. դեկտեմբերին:
Նախարարը ԲԷՑ ՓԲԸ պատասխանատուներին հանձնարարել է վերակառուցման աշխատանքների իրականացման ընթացքում առաջացած խնդիրներին տալ արդյունավետ լուծումներ՝ սահմանելով կատարման հստակ ժամկետներ, ինչպես նաև հետևողականորեն շարունակել հսկողությունը՝ ապահովելով աշխատանքների պատշաճ որակով իրականացումը»:
