Քաղաքականություն
14.10.2021 | 11:09
Նորվեգիայի Կունգսբերգ քաղաքում նետ ու աղեղով զինված տղամարդը սպանել է հինգ մարդու, երկուսին ՝ վիրավորել: Այս մասին հայտնել են Նորվեգիայի ոստիկանությունից, գրում է BBC-ի ռուսական ծառայությունը: Հարձակվողին ձերբակալել են ոստիկանները:
Ոստիկանությունից հայտնել են, որ տեղի ժամանակով ժամը 18։13-ին հաղորդագրություն է ստացվել, որ Կունգսբերգի կենտրոնով զինված տղամարդ է շարժվում։ Ինչպես պարզվել է ավելի ուշ, նա զինված է եղել նետ ու աղեղով։
Քաղաքի ոստիկանության վարչության պետ Օյվինդ Աասը հայտնել է, որ դեռ չի կարող պատասխանել բոլոր հարցերին, քանի որ հետաքննությունը նոր է սկսվել, և այն լայնածավալ է լինելու:
Նա հավելել է, որ կրակոցներ արձակած տղամարդը բերման է ենթարկվել, և որ ըստ ոստիկանության տրամադրության տակ եղած տվյալների՝ նա գործել է միայնակ:
Կասկածյալը սկսել է կրակել Coop Extra սուպերմարկետում, ինչից հետո տեղափոխվել է այլ վայր:
Վերջինիս գործողությունների դրդապատճառները դեռևս անհայտ են: Ոստիկանությունում դեռ չգիտեն ՝ արդյոք նրա գործողությունները կարող են որակվել որպես ահաբեկչություն, թեև չեն բացառում նման հնարավորությունը:
Տաթև Ֆռանգյան
