Քաղաքականություն
13.10.2021 | 21:46Պատմության մեջ առաջին անգամ, այսօր պաշտոնական այցով Հայաստան է ժամանել Հնդկաստանի արտգործնախարար Սուբրամանյամ Ջայշանկարը։ Սա վկայում է օրեցոր ընդլայնվող հարաբերությունների մասին․ հնդիկ գործընկերոջ հետ հանդիպումից հետո կայացած համատեղ ասուլիսը Արարատ Միրզոյանը սկսեց այս փաստն արձանագրելով։ Զրուցակիցները, ի թիվս այլ հարցերի, քննարկել են նաև «Հյուսիս-Հարավ» միջազգային տրանսպորտային միջանցքի շուրջ ընթացիկ զարգացումները: Հնդկաստանի արտգործնախարարն առաջարկել է Իրանի Չաբահար նավահանգիստն օգտագործել որպես «Հյուսիս-հարավ» միջազգային տրանսպորտային միջանցքի հանգույց։
«Ուղիղ հաղորդակցության պակասը թե՛ ծովային, թե՛ ցամաքային, խոչընդոտ է մարդկանց շփումների և փոխադրումների համար։ Հյուսիս-հարավը նոր առևտրային կապեր կստեղծի, որոնք ավելի արդյունավետ կլինեն, քան ծովային ուղիները, հետևաբար լրացուցիչ հնարավորություններ կտան տնտեսական զարգացման համար», – ասել է Ջայշանկարը։
«Հյուսիս-Հարավ» միջազգային տրանսպորտային միջանցքն ուղևորափոխադրումների և բեռնափոխադրումների մուլտիմոդալ երթուղու ծրագիր է, որը ձգվում է Մումբայից Սանկտ-Պետերբուրգ՝ 7200 կմ ընդհանուր երկարությամբ: Այն ստեղծվել է՝ ներգրավելու բեռնափոխադրումների տրանզիտը Հնդկաստանից, Իրանից և Պարսից ծոցի մյուս երկրներից Ռուսաստանի տարածքով դեպի Հյուսիսային և Արևմտյան Եվրոպա: Այս միջանցքում Հայաստանի գործուն մասնակցություն ունենալու հնարավորություններն են մշտապես ուշադրության արժանացել։ Անդրադառնալով Պարսից ծոց-Սև ծով նախաձեռնությանը՝ Միրզոյանը հայտնեց, որ իրանական կողմի հետ նախորդ օրը քննարկել է այս հարցը և հույս հայտնեց, որ մոտ ապագայում համաձայնություն կստորագրվի:
Այս տարի լրանում է հայ-հնդկական դիվանագիտական հարաբերությունների հաստատման 30 տարին։ Որ Հնդկաստանը Հայաստանի կարևորագույն գործընկերներից է և համագործակցության հետագա ամրապնդումը Հայաստանի արտաքին քաղաքական առաջնահերթություններից է ՝ ամրագրված է նաև Հայաստանի Կառավարության ծրագրում։ Հնդկաստանն էլ Հայաստանին է դիտարկում որպես սերտ համագործակցող երկիր՝ ընդգծեց Ջայշանկարը։
Հետաքրքրական է, որ մինչ այս չեզոք քաղաքականություն վարած Հնդկաստանը փոխում է իր մոտեցումները և առաջին քայլը անում է հենց Հայաստանի հետ՝ նկատում է քաղաքագետ Լևոն Շիրինյանը։ Ինչ վերաբերում է Հյուսիս-Հարավին, ապա այն դառնալու է Հայաստանի ողնաշարը, որն, ըստ Շիրինյանի, հակադրվելու է, այսպես ասած, ռուս-թուրքական միջանցքին։
Այս տարվա մայիսին Հնդկաստանի Արտաքին գործերի նախարարությունը նաև հայատարարություն էր տարածել, նշելով, որ ադրբեջանական ԶՈՒ-ն պետք է հետ քաշվեն Հայաստանի ինքնիշխան տարածքից։
Հնդկաստանի արտաքին գերատեսչության ղեկավարի երկօրյա այցը այսօր ավարտվում է։ Մինչ այդ կայացել են նաև հանդիպումներ վարչապետ Նիկոլ Փաշինյանի և Ազգային ժողովի նախագահ Ալեն Սիմոնյանի հետ։ Հնդկաստանի արտաքին գերատեսչության ղեկավարը ծաղիկներ է խոնարհել նաև Հայոց ցեղասպանության զոհերի հուշահամալիրում։
Առավել մանրամասն՝ տեսանյութում։
Սաթենիկ Հայրապետյան
