18.01.2026 | 17:17
Bild. Գերմանացի զինվորականները վաղաժամ և «առանց բացատրությունների» լքել են Գրենլանդիան
Չավուշօղլուն Հայաստանից պահանջել է հնարավորինս շուտ Ադրբեջանին փոխանցել ականապատ դաշտերի քարտեզները
Քաղաքականություն
13.10.2021 | 14:04
Թուրքիայի ԱԳ նախարար Մևլութ Չավուշօղլուն ադրբեջանական Report գործակալության հետ զրույցում խոսել է Արցախի գրավյալ տարածքների վերականգնման մասին՝ նշելով, որ Թուրքիան Ադրբեջանին ցուցաբերում է ու կշարունակի ցուցաբերել հնարավոր ամեն օգնություն։
«Սակայն Ղարաբաղի վերականգնման աշխատանքների արագացման համար անհրաժեշտ է տարածքներն ականներից մաքրել, որոնք հայերն են տեղադրել։ Հայտնի չէ՝ որտեղ են ականներ տեղադրված։ Հայերը Ադրբեջանին են փոխանցել ականապատ դաշտերի որոշ քարտեզներ, սակայն մնացածները դեռ չեն տրամադրվել»,- ասել է Չավուշօղլուն՝ նշելով, որ Հայաստանը առաջիկայում պետք է դրական քայլեր ձեռնարկի այդ հարցը պարզեցնելու, հարաբերությունների կարգավորման ու խաղաղության համար։
«Հայաստանը պետք է հնարավորինս շուտ Ադրբեջանին փոխանցի այդ տարածքներում տեղադրված բոլոր ականների քարտեզները։ Ի վերջո, տարածքները պետք է ականներից մաքրվեն, որպեսզի մարդիկ իրենց կյանքը չկորցնեն հայրենի հողերում։ Ադրբեջանը երբեք միայնակ չի եղել, մենք երբեք Ադրբեջանին միայնակ չենք թողնի։ Թող բոլորն այդ մասին իմանան»,- ասել է Չավուշօղլուն։
Թուրքիայի ԱԳ նախարարը ոչինչ չի խոսել Ադրբեջանում ապօրինաբար պահվող հայ ռազմագերիների մասին, որոնց վերադարձն ամրագրված է 2020թ-ի նոյեմբերի 9-ի Հայաստանի, Ռուսաստանի ու Ադրբեջանի եռակողմ հայտարարության մեջ, սակայն այն ադրբեջանական կողմը չի կատարում։
Թուրք նախարարը նաև չի հիշել, թե ինչպես ամիսներ առաջ Արցախի գրավյալ հայկական Շուշի ուղևորվելիս Թուրքիայի ու Ադրբեջանի նախագահները ցինիկաբար քննարկում էին Բաքվում պահվող հայ գերիների հարցը։ Զրույցին միացած Թուրքիայի նախագահի կինը՝ Էմինե Էրդողանը, Ադրբեջանի նախագահ Իլհամ Ալիևին «խորհուրդ էր տալիս պահել հայ ռազմագերիներին և միայն խումբ-խումբ վերադարձնել»։
Էմմա Չոբանյան
