Քաղաքականություն
13.10.2021 | 13:31
Աշխարհի ամենազարգացած տնտեսությունների առաջնորդները երեքշաբթի հանդիպել են արտահերթ վիրտուալ գագաթնաժողովի ժամանակ ՝ որոշելու, թե ինչպես օգնել Աֆղանստանին, որն արագորեն մոտենում է տնտեսական և հումանիտար աղետի, գրում է BBC-ի ռուսական ծառայությունը:
Գերմանիայի կանցլեր Անգելա Մերկելի խոսքով ՝ «Մեծ քսանյակի» երկրները գտնվում են ծանր վիճակում. նրանք ցանկանում են օգնություն տրամադրել Աֆղանստանին, որպեսզի երկիրը քաոսի մեջ չընկղմվի, բայց հնարավորինս շրջանցելով թալիբների ռեժիմը։
Գագաթնաժողովի ժամանակ առաջնորդները վերահաստատել են նվիրատվությունները շարունակելու իրենց պատրաստակամությունը: Եվրահանձնաժողովի ղեկավար Ուրսուլա ֆոն դեր Լայենն առաջարկել է Աֆղանստանին հատկացնել մեկ միլիարդ դոլարի օգնության փաթեթ, որից 300 միլիոնը, ըստ նրա, հումանիտար աղետը կանխելու համար: Բացի այդ, գումարը կհատկացվի հարևան երկրներին, որոնք կարող են ընդունել աֆղան փախստականներին:
Տաթև Ֆռանգյան
