Շիրակի մարզպետի տեղակալ Հովհաննես Զորաբյանն այսօր քաղաքապետարանի աշխատակազմին ներկայացրեց Գյումրիի համայնքապետի ժ/պ Ալբերտ Մարգարյանին, որը նշանակվել էր վարչապետ Նիկոլ Փաշինյանի այսօրվա որոշմամբ։
Ալբերտ Մարգարյանը 2005 թվականից զբաղեցրել է Շիրակի մարզպետարանի քաղաքաշինության վարչության պետի պաշտոնը։
Այսօր լրացել է Գյումրու ՏԻՄ-ի պաշտոնավարման հինգ տարվա ժամկետը, հետևաբար և դադարեցվել են նրանց լիազորությունները՝ թե՛ քաղաքապետի, և թե՛ ավագանու։
«Պարոն Մարգարյանն ունի տեխնիկական գիտությունների թեկնածուի և Հայաստանի Հանրապետության ճարտարագիտական ակադեմիկոսի որակավորում։ Որպես շինարար և քաղաքաշինության փորձառու մասնագետ՝ առհասարակ ներկայացնելու կարիք չկա, լավ տեղյակ եք։ Շնորհակալություն եմ հայտնում պարոն Բալասանյանին՝ երկարատև աշխատանքի, անցած ճանապարհի համար, ու ձեզ՝ պարոն Մարգարյան, մաղթում եմ արդյունավետ աշխատանք՝ ի նպաստ Գյումրիի և գյումրեցու»,- ասաց մարզպետի տեղակալը։
Ալբերտ Մարգարյանը, շնորհակալություն հայտնելով վարչապետին, ցուցաբերած մեծ վստահության համար, ասաց․ « Ճիշտ է՝ իմ պաշտոնավարումը կարճ ժամանակահատված է ունենալու, որովհետև Գյումրու ՏԻՄ ընտրություններն են, բայց շարունակելու ենք քաղաքապետարանի, համայնքի բնականոն գործունեությունը, որպեսզի թե՛ ընտրական գործընթացների ժամանակ, թե՛ հետագայում, հետընտրական ժամանակահատվածում՝ մինչև նոր ավագանու ձևավորումը և քաղաքապետի նշանակումը, քաղաքապետարանի գործունեությունը լինի համահունչ և բնականոն գործընթացը շարունակվի՝ առանց որևէ խոչընդոտներիի։
Գիտենք, որ համայնքային տնտեսությունը բավականին բարդ է, ծավալուն է և անմիջապես կապված է քաղաքի ազգաբնակչության հետ և պետք է այնպես անենք, որպեսզի ազգաբանակչությունը ընդհանարպես տարբերություն չզգա կատարվող գործընթացներում՝ իր շահերի առումով»։
Լրագրողների հետ զրույցում Ալբերտ Մարգարյանը տեղեկացրեց, որ Գյումրիի համայնքապետի ժ/պ նշանակվելու առաջարկություն երկու օր առաջ իրեն արել է Շիրակի մարզպետ Հովհաննես Հարությունյանը։
«Կպաշտոնավարեմ մինչև նոր քաղաքապետի պաշտոնի ստանձնելը»,-ասաց Ալբերտ Մարգարյանը։
Նա նաև տեղեկացրեց, որ այսօր Շիրակի մարզպետարանի քաղաքաշինության վարչության պետի պաշտոնից ազատման դիմում է ներկայացրել։
Արմիկ Մովսիսյան
