12.09.2026 | 10:41
Լիբանանի նախագահը հանդիպել է ՀՀ դեսպանին
Ասում են՝ 25000-ով կոմունալը, տան վարձը կմուծեք, ուտել-խմելու հարցերը կլուծեք, մնացածն էլ հետ կգցեք. ՏԵՍԱՆՅՈՒԹ
Հասարակություն
12.10.2021 | 12:16
Արցախից տեղահանված բնակիչներն ակցիա են իրականացնում Կառավարության շենքի դիմաց: Նրանք պահանջում են լուծել իրենց բնակարանի հարցը, քանի որ պատերազմից հետո իրենց բնակավայրերը մնացել են Ադրբեջանի վերահսկողության տակ անցած տարածքներում:
«Որոշել են ամսական 25 հազար դրամ տալ մեկ շնչին և առաջարկել են մեզ ինչպես ծախսել փողը, ասել են՝ կոմունալները կփակեք, տան վարձերը կտաք, մի քիչ էլ հետ կգցեք»,-լրագրողների հետ զրույցում նշեց ակցիայի մասնակիցներից «Հանուն Հադրութի» ՀԿ նախագահ Լևոն Հայրյանը։ Նա մտահոգություն հայտնեց, որ ամեն անգամ իրենց հրավիրում են ներս, հարցեր տալիս, հետո իրենք դուրս են գալիս ժողովրդին ինչ-որ խոստումներ տալիս, սակայն վերջում չի ստացվում։
«Բնակարանի մասին խոսելը մեզ համար դարձել է շքեղություն, բնակարան կարող է կառուցեն 3 տարում, բայց այդ ընթացքում մենք պետք է գոյատևենք, 68 հազարական դրամները և բնակվարձի համար նախատեսված 30 հազարական դրամները չեն վճարում, որոշել են ընդամենը 25 հազար դրամ տալ»,- նշեց Հայրյանը:
Դիտարկմանը, որ Աշխատանքի և սոցիալական հարցերի նախարարն օրեր առաջ վստահեցրել էր, որ հադրութցիների համար Արցախում բնակարանաշինության ծրագիր կա, ստացվում է, որ հադրութցիները պետք է վերադառնան Արցախ, Լևոն Հայրյանն արձագանքեց․ «Արցախ վերադառնալն ինձ և մեր ժողովրդին կգայթակղի միայն այն ժամանակ, երբ այնտեղ սկսվի ազգային-ազատագրական պայքար, եթե պայքար չկա, եթե Ադրբեջանի իշխանությունները հայտարարում են, որ Ղարաբաղը վերացրել են, այդպիսի տարածաշրջանային միավոր չկա․․․ Ես 100 անգամ հայտարարել եմ, եթե Արցախին ստատուս չտրվի Հայաստանի կազմում կամ գոնե անկախ, Արցախում հայ չի մնալու․․․ Ես իրենց մի քանի անգամ զգուշացրել եմ, որ ձեր դիմաց մարդիկ են կանգնած, հասկացեք, որ մարդիկ ունեն իրավունքներ, եթե ուզում են բնակչությանը տանեն Արցախ, թող այնտեղ ստեղծեն գրավչություն»։
Մանրամասները՝ տեսանյութում:
