ԵՐԵՎԱՆԻ ԺԱՄԱՆԱԿՈՎ․ Այսօր մեր ժողովուրդն ունի ճշմարտության կարիք` կլինի դառը, թե քաղցր. ինքներս մեզ շատ ենք խաբել. Բարսեղ Թումանյան․ ՏԵՍԱՆՅՈՒԹ

Մեր օպերային թատրոնն իր վարած քաղաքականությունը վերանայելու կարիք ունի. մենք կորցրել ենք մեր պատմությունը և փնթի ձևով ենք վերաբերվում մեր անցյալին: Մենք ինքներս մեզնից հետ ենք մնացել, մեր մշակույթը, մատնահետքը չենք ճանաչում, մինչդեռ պետք է ճանաչես, որ վստահես: Factor.am-ի հետ զրույցում նման տեսակետ է հայտնում ՀՀ ժողովրդական արտիստ, օպերային երգիչ Բարսեղ Թումանյանը:

Նրա խոսքով՝ հաճախ մենք մեր երկրի ներսում հայկական օպերաներ բեմադրելու ցանկություն չունենք, մինչդեռ պարտավոր ենք դա անել, պարտավոր ենք ներգրավել ժամանակակից կոմպոզիտորների՝ միևնույն ժամանակ ցույց տալով, որ միջազգային գործեր բեմադրելու կարողություն ևս ունենք։

«Ինչպես շախմատին ենք վերաբերվում, այնպես էլ օպերային արվեստին պետք է վերաբերվենք, բնականաբար՝մեծ ուշադրություն դարձնելով ազգային երգացանկին: Մենք եվրոպական օպերայից դեպի հայկականն ավելի ուշ կգանք, քան հայկականից` եվրոպականը: Պետք է մտածենք նաև, որ հաճույք պատճառելուց զատ՝ օպերային արվեստը պետք է մեսիջ, խոսք փոխանցի հանդիսատեսին. եթե դա տեղ չհասնի, օպերան կկորցնի գույնն ու արժեքը: Մենք մշակույթից չպետք է եկամուտ սպասենք. եթե թատրոնը մինուսով չի աշխատում, արդեն լավ է. այս դեպքում շահը կիրթ քաղաքացին է»,- ասում է նա:

Բարսեղ Թումանյանը, բացի արվեստին առնչվող թեմաներից, անդրադառնում է նաև հետպատերազմյան Հայաստանում հանրային համերաշխության մթնոլորտի հաստատման անհրաժեշտությանը. «Այսօր մեր ժողովուրդն ունի ճշմարտության կարիք՝ կլինի դառը, թե քաղցր. նշանակություն չունի, ինքն արդեն կվերծանի դա: Ամեն դեպքում, խաբեություն չպետք է լինի, իսկ մենք ինքներս մեզ շատ ենք խաբել: Ու մի բան էլ՝ ժողովուրդը չպետք է քաղաքական ուժերին լսի. նրանք պայքարում են իրար դեմ և նպատակն իշխանության գալն է»:

Մանրամասները՝ տեսանյութում:

Աննա Բաբաջանյան