19.12.2025 | 23:07
Պետությունը շարունակելու է աշխատանքներ իրականացնել սոցբնակարանային ֆոնդի ընդլայնման ուղղությամբ. ԱՍՀ նախարար
Բաքուն չի բացառում Հայաստանի և Ադրբեջանի ԱԳ նախարարների նոր հանդիպման հնարավորությունը
Քաղաքականություն
07.10.2021 | 13:40
Պաշտոնական Բաքուն չի բացառում Հայաստանի և Ադրբեջանի ԱԳ նախարարների նոր հանդիպման հնարավորությունը՝ քննարկելու երկկողմ հարաբերությունները։ Այս մասին հայտարարել է Ադրբեջանի ԱԳՆ մամուլի ծառայության ղեկավար Լեյլա Ադբուլլաևան, հաղորդում են տեղական լրատվամիջոցները։
«Օգտակար ենք համարում քննարկել հարցեր, որոնք կապված են հետկոնֆլիկտային փուլում հայ-ադրբեջանական հարաբերությունների կարգավորման հետ։ Ավելի վաղ երկու երկրների ԱԳ նախարարները հանդիպել են Նյու Յորքում։ Մենք չենք բացառում ապագայում նման հանդիպման անցկացումը»,- ասել է Աբդուլլաևան։
Նա նշել է, որ Ադրբեջանը հանդես է գալիս հարցերը բանակցությունների միջոցով լուծելու օգտին։ Աբդուլլաևան նաև հայտարարել է, թե ներկայում ուշադրություն պետք է դարձնել Ադրբեջանի, Հայաստանի և Ռուսաստանի ղեկավարների համատեղ հայտարարությունների կետերի իրականացմանը։ Ըստ նրա՝ հիմնական հարցերը, որոնք հատուկ ուշադրություն են պահանջում, հանդիսանում են հաղորդակցությունների բացումը, ինչպես նաև սահմանների դելիմիտացիան։
«Մենք գտնում ենք, որ հաղորդակցությունների բացումը, սահմանների դելիմիտացիայի շուրջ բանակցությունների սկսումը կարող են հիմք ստեղծել տարածաշրջանում կայուն խաղաղության հաստատման, մեր կառուցողական առաջընթացի համար»,- ասել է Աբդուլլաևան։
Հիշեցնենք՝ նախօրեին էլ ՀՀ ԱԳ նախարար Արարատ Միրզոյանը հայտարարել է, որ Նյու Յորքում Ադրբեջանի ԱԳ նախարարի հետ պայմանավորվել են ԵԱՀՄ Մինսկի խմբի համանախագահների միջնորդությամբ նորից հանդիպել։
Էմմա Չոբանյան
