03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Հայաստանն ու Ուկրաինան ամրապնդում են համագործակցությունը զբոսաշրջության ոլորտում
Տնտեսություն
06.10.2021 | 16:00
Հոկտեմբերի 7-8-ը Ուկրաինայի մայրաքաղաքում տեղի կունենա «Բացահայտիր Հայաստանը» Road show-ն, որին կմասնակցեն երկու երկրների զբոսաշրջության ոլորտի ներկայացուցիչները, հաղորդում է AnalitikaUA.net-ը:
Կազմակերպիչների խոսքով, Roadshow- ի նպատակն է ցուցադրել Հայաստանի զբոսաշրջության բազմազան առաջարկները Կիևի տուրօպերատորներին, տուրիստական գործակալներին և ԶԼՄ-ների ներկայացուցիչներին` երկիրը դիրքավորելով որպես նախընտրելի ուղղություն ուկրաինական տուրօպերատորների և ճանապարհորդների շրջանում:
Միջոցառման ընթացքում հայ տուրօպերատորները հնարավորություն կունենան ծանոթանալու Ուկրաինայի զբոսաշրջային ներուժին և զբոսաշրջային արտադրանքին:
ՀՀ էկոնոմիկայի նախարարության զբոսաշրջության կոմիտեի և Ուկրաինայի զբոսաշրջության զարգացման պետական գործակալության միջև կլոր սեղանի շրջանակներում կքննարկվեն զբոսաշրջության զարգացման համագործակցության հեռանկարները՝ առկա գործընկերության հետագա ամրապնդման և երկու երկրների միջև զբոսաշրջիկների հոսքի ավելացման նպատակով:
Ըստ Ուկրաինայի հայերի միության ղեկավար Վիլեն Շատվորյանի, զբոսաշրջության ոլորտում համագործակցության զարգացումը հնարավորություն կտա հաճախակի շփումներ իրականացնել Ուկրաինայի և Հայաստանի քաղաքացիների միջև, ինչը, անշուշտ, կնպաստի երկու ժողովուրդների բարեկամության ամրապնդմանը:
Երկու երկրների զբոսաշրջության պետական մարմինները կստորագրեն Համատեղ գործողությունների ծրագիր, որը իրավական հիմք կստեղծի Հայաստանի և Ուկրաինայի միջև զբոսաշրջության ոլորտում համագործակցության հետագա զարգացման համար:
Մասնակիցները հնարավորություն կունենան ծանոթանալու Հայաստանի՝ որպես գինու զբոսաշրջության երկրի մասին և ճաշակելու հայկական գինի:
Հրապարակման համաձայն ՝ միջոցառումները կազմակերպել է ՀՀ էկոնոմիկայի նախարարության զբոսաշրջության կոմիտեն ՝ Ուկրաինայի զբոսաշրջության զարգացման պետական գործակալության հետ համատեղ, Ուկրաինայի հայերի միության և Ուկրաինայում ՀՀ դեսպանության աջակցությամբ:
