23.08.2026 | 20:00
Ձուկը ջրում «բազար անելու» ՇԵՐՏԵՐԸ․ տնտեսվարողը կհասնի՞ Եվրոպա. ՏԵՍԱՆՅՈւԹ
Աշխարհի 45 երկրներ Կրեմլին հարցեր են ուղղել՝ Նավալնիի թունավորման և քիմիական զենքի կիրառման վերաբերյալ
Քաղաքականություն
06.10.2021 | 13:48
Քիմիական զենքի արգելման կազմակերպությանը (ՔԶԱԿ) պատկանող երկրները (ընդհանուր առմամբ՝ 45 երկիր) հարցեր են ուղարկել Ռուսաստանին 2020 թվականի ամռանը ռուս ընդդիմադիր Ալեքսեյ Նավալնիի թունավորման վերաբերյալ: Այս մասին Twitter-ում հայտնել է ՔԶԱԿ-ում Մեծ Բրիտանիայի պատվիրակությունը:
«Այսօր Քիմիական զենքի արգելման կազմակերպության անդամ 45 պետություններ, այդ թվում՝ Մեծ Բրիտանիան, ՔԶԱԿ-ի գործադիր խորհրդին տեղեկացրել են, որ պաշտոնապես Ռուսաստանին հարցեր են տալու Ալեքսեյ Նավալնիի թունավորման վերաբերյալ»,- ասված է հաղորդագրության մեջ:
Նշվում է, որ Ռուսաստանին հարցերն ուղարկվել են Քիմիական զենքի արգելման կազմակերպության (ՔԶԱԿ) գործադիր խորհրդի նիստին:
Հիշեցնենք՝ Ալեքսեյ Նավալնին օգոստոսի 20-ին հոսպիտալացվել էր Օմսկում: Տոմսկից Մոսկվա ուղևորվող ինքնաթիռում վերջինն իրեն վատ է զգացել: Ռուսական կողմը հայտարարել է, որ այդ ժամանակ Նավալնիի մարմնում թույն կամ թունավոր նյութեր չեն հայտնաբերվել: Ավելի ուշ նա բուժման է տեղափոխվել Բեռլինի կլինիկա, որտեղ նրա մոտ ախտորոշվել է «Նովիչոկ» խմբի թույնով թունավորում․ Նավալնու օրգանիզմում հայտնաբերվել են նյարդային համակարգը կաթվածահար անող քիմիական նյութի հետքեր։
Պաշտոնական Մոսկվան իր հասցեին հնչող մեղադրանքները «դատարկ աղմուկ» է որակել։
Գերմանիայում բուժումն ավարտելուց հետո Նավալնին հունվարի 17-ին վերադարձել է Ռուսաստան և անմիջապես ձերբակալվել։ Փետրվարի 2-ին դատարանը նրան 3,5 տարվա ազատազրկման է դատապարտել։
