Հասարակություն
05.10.2021 | 13:46Երևան քաղաքի ընդհանուր իրավասության դատարանի Շենգավիթի նստավայրում շարունակվում է ՀՀ երկրորդ նախագահ Ռոբերտ Քոչարյանի և նախկին փոխվարչապետ, ԱԺ պատգամավոր, ԵԽԽՎ պատվիրակության անդամ Արմեն Գևորգյանի գործի քննությունը։
Արմեն Գևորգյանի փաստաբան Լուսինե Սահակյանը նրա անձեռնմխելիության ճանաչման մասին միջնորդություն ներկայացրեց։
Փաստաբանը հիշեցրեց, որ ԵԽԽՎ-ում պատվիրակության անդամ լինելը ենթադրում է պատգամավորի անձեռնմխելիություն, իսկ անձեռնմխելիությունից զրկելու դեպքում պետք է նաև ԵԽԽՎ-ի համաձայնությունը։
«Անձեռնմխելիությունը բացարձակ է, մշտական և անժամկետ։ Այն կիրառվում է նաև պատգամավորի լիազորությունների դադարեցումից հետո»,- ընգծեց փաստաբանը։
Հիշեցնենք, որ ավելի վաղ դատարանն արգելել էր Գևորգյանին մեկնել Ստրասբուրգ՝ մասնակցելու ԵԽԽՎ նիստին։
Փաստաբանը նկատեց, որ դատախազի հայտարարությունը տարօրինակ է․ Գևորգյանի անձեռնմխելիությունը որպես ԵԽԽՎ պատվիրակության անդամ ճանաչված է Հայաստանի միջազգային պայմանագրով։ «Գևորգյանին արգելելով մեկնել Ստրասբուրգ՝ Դուք թույլ չտվեցիք ԵԽԽՎ-ում բարձրացնել գերիների հարցը և Հայաստանի շահերից բխող գործողությունները»,- ասաց փաստաբանը։ Լուսիեն Սահակյանը հավելեց, որ դա Հայաստանի համար լուրջ հարված է:
Հիշեցնենք` Ռոբերտ Քոչարյանը և Արմեն Գևորգյանը մեղադրվում են առանձնապես խոշոր չափերով կաշառք ստանալու համար, Արմեն Գևորգյանը նաև հանցավոր ճանապարհով ստացված գույքն օրինականացնելու մեջ և այդ մասով նիստը շարունակվելու է։ Քոչարյանը մեղադրվում է 3 միլիոն դոլար կաշառք ստանալու, Գևորգյանը՝ 1 միլիոն դոլար կաշառք ստանալու համար:
Մանրամասները՝ տեսանյութում:
