27.11.2024 | 14:22
Փաշինյանի իշխանության օրոք «պադավատների» թիվն ավելացել է՝ ի հեճուկս Փաշինյանի պնդումների
Հյուսիսային և Հարավային Կորեաները վերականգնել են հաղորդակցությունը
Քաղաքականություն
04.10.2021 | 18:41
ԿԺԴՀ-ն (Հյուսիսային Կորեա) և Կորեայի Հանրապետությունը (Հարավային Կորեա) վերականգնել են հաղորդակցությունն այն բանից հետո, ինչ Փհենյանն օգոստոսին ընդհատել էր շփումները՝ հարուցելով ամբողջ աշխարհի անհանգստությունը: Կորեայի Հանրապետության միավորման նախարարության հաղորդման համաձայն՝ երկու երկրների պաշտոնյաները երկու ամսվա ընթացքում առաջին հեռախոսազրույցն են ունեցել, գրում է DW-ի ռուսական ծառայությունը։
«Կառավարությունը կարծում է, որ Հարավի և Հյուսիսի միջև կապի ուղիների վերականգնմամբ հիմք է դրվել միջկորեական հարաբերությունների վերականգնման համար»,- նախարարության խոսքն է մեջբերում AFP-ն:
Հյուսիսային Կորեայի Կենտրոնական հեռագրային գործակալությունը հայտնում է, որ ԿԺԴՀ առաջնորդ Կիմ Չեն Ընն անցած շաբաթ «մտադրություն է հայտնել վերականգնել Հյուսիսի և Հարավի միջև խզված կապի գծերը»՝ որպես Կորեական թերակղզում «տևական խաղաղություն» հաստատելու ջանքերի մի մաս:
Նման որոշում է կայացվել այն բանից հետո, ինչ Փհենյանի կողմից հրթիռային փորձարկումների շարքից հետո միջազգային հանրությունը լուրջ մտահոգություն է հայտնել: Այս փորձարկումները պատճառ դարձան ՄԱԿ-ի Անվտանգության խորհրդի արտակարգ նիստ գումարելու համար:
Հուլիսի վերջին կորեական երկու պետությունները հայտարարեցին միջսահմանային հաղորդակցության բոլոր ուղիներով շփումների վերսկսման մասին՝ դրանով իսկ մերձեցման ազդանշաններ հղեով: Մինչ այս, Հյուսիսի և Հարավի միջև կապն ընդհատվել էր մեկ տարով:
Սակայն լարվածության թուլացումը երկար չտևեց. երկու շաբաթ չանցած՝ Փհենյանը դադարեց պատասխանել Սեուլի կոչերին՝ բողոքելով Հարավային Կորեայի և ԱՄՆ-ի համատեղ զորավարժությունների դեմ:
Տաթև Ֆռանգյան
