16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Մենք բարձր ենք գնահատում ԼՂ հակամարտության նկատմամբ Լիտվիայի որդեգրած դիրքորոշումը․ վարչապետ. ՏԵՍԱՆՅՈՒԹ
Քաղաքականություն
04.10.2021 | 10:55
Լիտվան Եվրամիությունում Հայաստանի առանցքային գործընկերներից է և կարող է կարևոր դերակատարում ունենալ ԵՄ հետ Հայաստանի երկխոսության և համագործակցության խթանման հարցում: Այս մասին ասաց ՀՀ վարչապետ Նիկոլ Փաշինյանը՝ Լիտվայի վարչապետ Ինգրիդա Շիմոնիտեի հետ հանդիպման արդյունքում համատեղ հայտարարության ժամանակ:
Փաշինյանը նախ շնորհակալություն հայտնեց Լիտվայի վարչապետ Ինգրիդա Շիմոնիտեին՝ Լիտվա պաշտոնական այց կատարելու հրավերի, ինչպես նաև՝ ցուցաբերված ջերմ հյուրընկալության համար:
«Լիտվան Եվրոպական Միությունում մեր առանցքային գործընկերներից է, և ես բարձր եմ գնահատում այս հնարավորությունը՝ հանդիպելու Լիտվայի վարչապետի, նախագահի և խորհրդարանի նախագահի հետ՝ մեր երկկողմ օրակարգը քննարկելու, ինչպես նաև ԵՄ հետ Հայաստանի համագործակցության վերաբերյալ և տարածաշրջանում տիրող իրավիճակի մասին տեսակետներ փոխանակելու համար: Հայաստանն ու Լիտվան կապված են բազմաթիվ թելերով: Ժողովրդավարական արժեքները և մեր ժողովուրդների միջև գոյություն ունեցող ավանդական բարեկամական հարաբերություններն ամուր հիմք են ստեղծել ամենատարբեր ոլորտներում երկկողմ համագործակցության համար՝ »,-ասաց Փաշինյանը:
Վարչապետը նկատեց՝ այսօր երկու երկրների միջև կա չօգտագործված ներուժ՝ համագործակցությունը ընդլայնելու զբոսաշրջության, տեղեկատվական տեխնոլոգիաների, կանաչ տեխնոլոգիաների, գյուղատնտեսության, սննդի վերամշակման և արդյունաբերության ոլորտներում:
«Հայաստանը դինամիկ հարաբերություններ ունի Եվրոպական Միության հետ: Իսկ Լիտվան, որպես բարեկամ պետություն և Արևելյան գործընկերության աջակից, կարող է կարևոր դերակատարում ունենալ ԵՄ հետ Հայաստանի երկխոսության և համագործակցության խթանման հարցում»,-ասաց Փաշինյանը:
Խոսելով տարածաշրջանային զարգացումների մասին, Նիկոլ Փաշինյանն նշեց, որ իր հանդիպումների ժամանակ ամենուր շեշտադրել է ԼՂ հակամարտությունը կարգավորելու ԵԱՀԿ ձևաչափի նպատակահարմարությունը։
«Հայաստանը բարձր է գնահատում Լիտվայի հավասարակշռված և կառուցողական դիրքորոշումը ղարաբաղյան հակամարտության հարցում, ինչպես նաև Լիտվայի կառավարության կողմից մարդասիրական օգնությունը` վերջին մեկ տարվա ընթացքում հայ ժողովրդի առջև ծառացած մարտահրավերները հաղթահարելու համար»,- ասաց վարչապետը:
Նա նաև հավելեց, որ Լիտվայի վարչապետին տեղեկացրել է հունիսի 20-ին Հայաստանում կայացած արտահերթ խորհրդարանական ընտրությունների արդյունքների մասին, որոնց արդյունքում երկրում հաղթահարված է ներքաղաքական ճգնաժամը: Նա ընդգծեց, որ այս ընտրությունները, ինչպես և նախորդ՝ 2018-ինը, արժանացել են միջազգային դիտորդների բարձր գնահատականին:
«Մենք բարձր ենք գնահատում Լեռնային Ղարաբաղի հակամարտության նկատմամբ Լիտվայի որդեգրած հավասարակշռված և կառուցողական քաղաքականությունը»,- ասաց վարչապետ Նիկոլ Փաշինյանը։
Մանրամասները՝ տեսանյութում:
