Հայտնի է, թե որտեղ է Միխայիլ Սաակաշվիլին․ նա Վրաստան չի ժամանել․ լրատվամիջոցներ

Միխայիլ Սաակաշվիլին իրականում չի լքել Ուկրաինայի սահմանները և գտնվում է Տրուսկավեց քաղաքում։ Այս մասին հայտնել է վրացական Imedi-ն, գրում է ՏԱՍՍ-ը։

Հեռուստաալիքի աղբյուրների տվյալներով՝ Սաակաշվիլին սեպտեմբերի 25-ին Ամստերդամից ժամանել է Ուկրաինա, ինչից հետո ոչ մի տեղ չի մեկնել և վերջին 4 օրերին գտնվում է Տրուսկավեցկում։ Հեռուստաընկերությունը չի հրապարակել իր զրուցակցի անունը, որը հայտնել է այս տեղեկությունը։

Վրաստանի ՆԳ փոխնախարար Ալեքսանդր Դարախվելիձեն իր հերթին ճեպազրույցի ժամանակ հայտարարել է, որ ուկրաինական կողմի հետ բանակցություններից հետո իրենց հաջողվել է պարզել, որ նախկին նախագահը չի հատել Ուկրաինայի հետ պետական սահմանը։

«Մենք ակտիվ շփում ենք ունեցել ուկրաինական կողմի հետ: Նրանց անունից կարող եմ վստահաբար և միանշանակ ասել, որ Միխայիլ Սաակաշվիլին չի հատել Ուկրաինայի պետական սահմանը»,- ասել է Դարախվելիձեն:

Հիշեցնենք՝ Վրաստանի նախկին նախագահ Միխայիլ Սաակշվիլին տեսաուղերձ էր հրապարակել՝ նշելով, թե գտնվում է Բաթումի քաղաքում:

«Սա իմ Բաթումին է: Հոկտեմբերի 2-ին մենք բոլորս պետք է գնանք քվեարկության և ձայն տանք «Ազգային շարժմանը»։ Ես այնքան եմ կարոտել այս վայրերը, այսօր իմ երազանքի իրականացման օրն է։ Ես ամեն ինչ վտանգեցի՝ իմ կյանքը, ազատությունը՝ այստեղ լինելու համար, և ես միայն խնդրում եմ ձեզ՝ գնալ ընտրությունների»,- ասել է Սաակաշվիլին:

Նա նաև կոչ է արել իր կողմնակիցներին հավաքվել Թբիլիսիում հոկտեմբերի 3-ին՝ պաշտպանելու ընտրությունների արդյունքները: Նա խոստացել է լինել մարդկանց շարքերում։

Տաթև Ֆռանգյան