22.04.2026 | 23:30
ՀՀ տարածքում ավտոճանապարհները հիմնականում անցանելի են
Պուտինն ու Էրդողանը Սոչիի բանակցություններում Ղրիմի թեման չեն քննարկելու․ Պեսկով
Քաղաքականություն
29.09.2021 | 15:00
ՌԴ նախագահ Վլադիմիր Պուտինն ու Թուրքիայի նախագահ Ռեջեփ Թայիփ Էրդողանը Սոչիում այսօր կայանալիք բանակցություններում Ղրիմի հարցը չեն քննարկելու։ Այս մասին լրագրողներին հայտնել է Պուտինի խոսնակ Դմիտրի Պեսկովը, գրում է ՏԱՍՍ-ը։
«Ո՛չ, այդ հարցը սովորաբար չի քննարկվում։ Ղրիմի առումով թուրքական կողմի հետ քննարկելու ոչինչ չկա, բացի այն, որ նախագահը բազմիցս հրավիրել է պարոն Էրդողանին այցելել Ղրիմ՝ տեսնելու, ինչ կա այնտեղ իրականում»,- ասել է Պեսկովը՝ պատասխանելով հարցին՝ արդյո՞ք ռուսական կողմը պատրաստվում է բարձրացնել Ղրիմի ճանաչման հարցը։
Պեսկովը նաև տեղեկացրել է, որ մամուլի համար բաց է լինելու «երկու նախագահների ողջույնի խոսքը», իսկ բանակցությունների արդյունքում մամուլի համար որևէ հայտարարություն նախատեսված չէ։
Պեսկովի խոսքով՝ բանակցություններն անցկացվելու են դեմ առ դեմ ձևաչափով՝ թարգմանիչների մասնակցությամբ։
Հիշեցնենք՝ Էրդողանը ՄԱԿ-ում հայտարարել էր, թե «Թուրքիան չի ճանաչում Ղրիմի բռնակցումը Ռուսաստանին», ինչպես և չի ճանաչում ՌԴ Պետդումայի ընտրությունները Ղրիմում։ Ի պատասխան՝ Պեսկովն ասել էր, որ ցավում են Էրդողանի հայտարարությունների համար ու չեն ընդունում թուրքական կողմի այդ դիրքորոշումը։
Հավելենք, որ թուրքական աղբյուրների հաղորդմամբ՝ Թուրքիայի նախագահի ինքնաթիռն արդեն ժամանել է Սոչի։
Էմմա Չոբանյան
