28.06.2026 | 03:11
ԱԱ-2026. Անգլիան ու Խորվաթիան հաղթեցին և կխաղան փլեյ-օֆֆում. ՏԵՍԱՆՅՈՒԹ
Ռուսական Lukoil-ը BP-ից գնել է Կասպից ծովի ադրբեջանական հատվածի երկրաբանական հետազոտական նախագծի բաժնեմասերի 25%-ը
Տնտեսություն
29.09.2021 | 15:15
Ռուսական «Lukoil» ընկերությունը համաձայնագիր է ստորագրել բրիտանական BP-ից Կասպից ծովի ադրբեջանական հատվածում Մակերեսային ջրերի Ապշերոնի թերակղզու (SWAP) հետազոտական ծրագրի 25% բաժնեմասը ձեռք բերելու մասին: Այս մասին գրում են ադրբեջանական լրատվամիջոցները՝ վկայակոչելով ռուսական ընկերության հաղորդագրությունը։
Նշվում է, որ գործարքն ավարտին կհասցվի մինչև այս տարեվերջ՝ Ադրբեջանի կառավարության հավանությունը ստանալուց հետո։
Գործարքի ավարտից հետո BP-ն կմնա ծրագրի օպերատոր՝ 25% բաժնեմասով։ Իսկ ծրագրի երրորդ մասնակիցն ադրբեջանական պետական նավթային SOCAR ընկերությունն է՝ 50% բաժնեմասով։
«BP-ի և SOCAR-ի հետ համատեղ նախագիծ մուտք գործելը համապատասխանոմ է Ռուսաստանի և Ադրբեջանի ազգային շահերին՝ էներգետիկայի ոլորտում միջազգային համագործակցության զարգացման շրջանակում։ Համոզված եմ, որ մասնակից գործընկերների գիտատեխնիկական ներուժը լրացուցիչ խթան կհանդիսանա Ապշերոնի արշիպելագի մակերեսային ջրերի հեռանկարային տարածքի յուրացման գործում»,- ասել է «Lukoil»-ի նախագահ Վագիտ Ալեքպերովը։
«Ուրախ ենք ողջունել Lukoil-ին՝ որպես նոր գործընկերոջ SWAP նախագծում՝ շարունակելով «Շահ Դենիզ» նախագծի շուրջ մեր բեղմնավոր հարաբերությունները: Հուսով ենք, որ Lukoil-ի և SOCAR-ի հետ սերտ համագործակցությունը հետախուզական ծրագրի շուրջ, հաջողության դեպքում, օգուտ կբերի և՛ Ադրբեջանին, և՛ մեր գործընկերությանը»,- իր հերթին նշել է BP-ի Ադրբեջանի, Վրաստանի և Թուրքիայի հարցերով տարածաշրջանային նախագահ Գերի Ջոնսը։
Հավելենք, որ այս ծրագրի համար 2014 թվականի դեկտեմբերին համաձայնագիր էր կնքվել BP-ի և SOCAR-ի միջև։
Էմմա Չոբանյան
