Հասարակություն
29.09.2021 | 12:07ՄԻՊ դիրքորոշումն այն է, որ Ադրբեջանի հետ միայն սահմանազատումը՝ առանց անվտանգության գոտի ստեղծելու, ոչ միայն չի ապահովելու ՀՀ քաղաքացիների ու հատկապես սահմանային բնակիչների իրավունքները, այլ նաև կդառնա նոր խախտումների ու նոր լարվածության պատճառ: Այս մասին այսօր հրավիրված քննարկմանը հայտնեց ՀՀ մարդու իրավունքների պաշտպանի օգնական Տաթևիկ Մանուկյանը:
Նրա խոսքով՝ Ադրբջանի բարձրագույն իշխանությունները ոչ միայն չեն դադարեցրել ատելության և թշնամանքի քարոզը, այլ նաև խորացրել են հայատյացության ու ֆաշիզմի հասնող թշնամանքի քաղաքականությունը ՀՀ բնակչության ու ողջ հայ ժողովրդի նկատմամբ. «Խոսքն իրական ցեղասպանության քաղաքականության մասին է»:
«ՄԻՊ-ը պատերազմի սկզբից ի վեր մշտադիտարկման է ենթարկել ադրբեջանական սոցիալական մեդիայի և մամուլի հրապարակումները, և արդյունքում հրապարակել է զեկույցներ, որոնք խոսում են այն մասին, որ խոշտանգումները և դաժանությունները, որ տեսանք պատերազմի ընթացքում և դրանից հետո, վառ արդյունքն են ադրբեջանական իշխանությունների հայատյաց քաղաքականության, որն իրականացվում է պետական հովանավորչությամբ:
ՄԻՊ-ը անդրադարձել է 300 տեսանյութերի, որոնք վերաբերում են գերիների և անհետ կորածների նկատմամբ ադրբեջանական վայրագությունների ու խոշտանգումներին. դրանք օբյեկտիվ ապացույցներ են, որոնք թարգմանվել և ուղարկվել են միջազգային գործընկերներին, պետական մարմիններին»,- նշեց Մանուկյանը:
ՄԻՊ օգնականը նաև ընդգծեց, որ այս դաժանությունների կրկնվելու վտանգը վերացած չէ, և տեղի ունեցածի համար որևէ մեկը պատասխանատվության չի ենթարկվել:
Մանրամասները՝ տեսանյութում:
