Քաբուլում կանանց արգելել են համալսարան հաճախել

Քաբուլի համալսարանը թույլ չի տալիս կանանց մուտք գործել ուսումնական հաստատություն, ընդ որում՝ ինչպես ուսանողուհիներին, այնպես էլ՝ կին դասախոսներին: Արգելքը կգործի այնքան ժամանակ, «քանի դեռ բոլորի համար իրական իսլամական միջավայր չի ապահովվել»։ Այս մասին հայտարարել է բուհի նոր ղեկավար Մոհամմադ Աշրաֆ Գայրաթը, հաղորդում է DW-ի ռուսական ծառայությունը։

Համալսարանի մի շարք աշխատակիցներ դեմ են հանդես եկել նորարարությանը։

Օրեր առաջ արմատական իսլամական «Թալիբան» շարժումը հրահանգել էր միջնակարգ դպրոցներն աստիճանական վերաբացել միայն տղաների և արական սեռի ներկայացուցիչ ուսուցիչների համար: Այսպիսով, Իսլամական Հանրապետությունն այժմ աշխարհի միակ երկիրն է, որտեղ աղջիկներին արգելվում է հաճախել կրթական հաստատություններ, հայտնում է epd գործակալությունը:

Նշվում է, որ 1990-ական թվականներին, երբ Աֆղանստանը գտնվում էր թալիբների վերահսկողության տակ, երկրում արդեն գործում էր կանանց կրթության արգելքը:

Քաբուլի համալսարանի գործող ղեկավարը, որը բակալավրի գիտական աստիճան ունի, մի քանի օր առաջ է փոխարինել նախկին ռեկտորին՝ գիտությունների դոկտոր Մուհամմադ Օսման Բաբուրիին։ Ավելի վաղ թալիբներին սատարող Գայրատը կոչ էր արել սպանել լրագրողներին ՝ նրանց «լրտեսներ» անվանելով:

Հիշեցնենք, որ Աֆղանստանից միջազգային ուժերի դուրսբերումից հետո «Թալիբան» շարժման զինյալներն օգոստոսի 15-ին մտան Քաբուլ, իսկ սեպտեմբերի 3-ին հայտարարեցին ամբողջ Աֆղանստանում վերահսկողություն հաստատելու մասին: Սեպտեմբերին նրանք հայտարարեցին անցումային կառավարության ձևավորման մասին, որում չկա ոչ մի կին կամ որևէ ներկայացուցիչ, որը պատասխանատու է կանանց իրավունքների պաշտպանության համար: Միջազգային հանրությունը չի ճանաչում թալիբների կառավարությունը։