Ես լավ եմ աշխատել Բուշի, Օբամայի և Թրամփի հետ, բայց չեմ կարող ասել, որ լավ ենք սկսել Բայդենի հետ․ Էրդողան

ԱՄՆ-ը անկեղծ դիրքորոշում չի որդեգրել Թուրքիային հինգերերոդ սերնդի F-35 կործանիչների փոխանցման հարցում։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Նյու Յորքում լրագրողների հետ հարցազրույցում, հաղորդում է «Անադոլու» գործակալությունը։

«Թուրքիան այդ հարցում ազնիվ է գործում, սակայն, ցավոք, ԱՄՆ-ը չի գործել ու չի գործում ազնիվ»,- ասել է Էրդողանը՝ հավելելով, որ ԱՄՆ-ը հրաժարվում է F-35-ներ փոխանցել՝ «որպես պատրվակ օգտագործելով S-400-ները»։

Թուրքիայի նախագահը նաև նշել է, թե Անկարան ձգտում է, որ Թուրքիան ու ԱՄՆ-ը, որպես ՆԱՏՕ-ի անդամ երկու պետություն, միմյանց վերաբերվեն բարեկամաբար, ոչ թե թշնամաբար։

Բացի այդ, Էրդողանը բողոքել է ԱՄՆ նախագահ Ջո Բայդենից։ Նա ասլ է, թե ի տարբերություն նախորդ վարչակազմերի՝ Սպիտակ տան ներկա վարչակազմը հեռու է Անկարայի հետ հարաբերություններում կառուցողական դիրքորոշումից։

«Ես լավ եմ աշխատել Բուշ կրտսերի, պարոն Օբամայի, պարոն Թրամփի հետ, սակայն ես չեմ կարող ասել, որ մենք լավ ենք սկսել պարոն Բայդենի հետ»,- ասել է Էրդողանը։

Նա քննադատել է ամերիկյան իշխանություններին՝ «ահաբեկչական կազմակերպություններին զենք փոխանցելու» և Թուրքիայի ազգային անվտանգության համար վտանգներ ստեղծելու համար։

Խոսելով Աֆղանստանից՝ Թուրքիայի նախագահն ասել է, որ այդ երկրում ստեղծված բարդ իրավիճակը նաև ԱՄՆ-ի գործողությունների հետևանքն է։

«Եթե նայեք զենքին, որը հիմա գտնվում է թալիբների ձեռքում, ապա դրանք ամերիկյան են։ Հետևաբար, նրանք ստիպված կլինեն դրա համար գին վճարել»,- ասել է Էրդողանը։ Մեկնաբանելով Աֆղանստանում քաղաքական ճգնաժամի հանգուցալուծման գործընթացի հեռանկարները՝ նա նշել է, որ հետևելով «թալիբների ներկա մոտեցմանը, կարելի է ցավով արձանագրել, որ Աֆղանստանում համապարփակ վարչակազմ այդպես էլ չի ձևավորվել»:

Էմմա Չոբանյան