Պուտինի հետ առանցքային հանդիպման նախաշեմին Էրդողանը կրկին զորքեր է ուղարկում Սիրիա

Թուրքիան ավելի շատ զորքեր է ուղարկում Սիրիայի հյուսիս-արևմուտք՝ հաջորդ շաբաթ Ռուսաստանի և Իրանի առաջնորդների հետ առանցքային հանդիպումներից առաջ։ Այս մասին գրում է «Bloomberg»-ը։

Նշվում է, որ սրանով ազդարարվում է սիրիական պատերազմի վերջին առաջնագծերից մեկի վրա հարձակումն արգելափակելու վճռականության մասին։

Ըստ հրապարակման՝ Ռեջեփ Թայիփ Էրդողանի կառավարությունը վաղուց մտավախություն ունի ռուսամետ սիրիական ուժերի հարձակման հետ կապված՝ դեպի Իդլիբի բաստիոն, ինչը դեպի Թուրքիայի սահման ավելի շատ փախստականների հոսքի պատճառ կդառնա։

Հրապարակման մեջ նշվում է, որ չնայած հիմա դեռ չկա մասշտաբային հարձակման ազդանշան, սակայն ռուսական ինքնաթիռների ու սիրիական ուժերի հարձակումները գրավել են թուրք պաշտոնյաների ուշադրությունը։

Սպասվում է, որ Էրդողանը Իդլիբի էսկալացիայի հարցը բարձրացնելու է, երբ սեպտեմբերի 29-ին հանդիպի Վլադիմիր Պուտինի և սիրիական ռեժիմի մեկ այլ աջակցի՝ Իրանի նախագահ Էբրահիմ Ռաիսիի հետ։ Այս մասին լրատվամիջոցին հայտնել են թուրք պաշտոնյաները անանունության պայմանով։

Նրանք ասել են, որ լրացուցիչ հազարավոր զինծառայողներն օգնելու են կանխել Իդլիբի ուղղությամբ սիրիական ուժերի առաջխաղացման ցանկացած փորձ ու վերահսկել Թուրքիայի սահման տանող ճանապարհները։

Իդլիբի շուրջ դիրքերը 2020 թվականի մարտից հիմնականում չեն փոխվել, երբ Պուտինն ու Էրդողանը հաշտության համաձայնագիր կնքեցին՝ վերջ դնելով թուրքական ու սիրիական ուժերի միջև կատաղի մարտերին։

Էմմա Չոբանյան