Իրանի ԱԳ փոխնախարարն Ադրբեջանին շնորհավորել է «օկուպացված տարածքների ազատագրման» կապակցությամբ 

Իրանը Ադրբեջանի ու Թուրքիայի հետ ունի լավ երկկողմ կապեր և հիմնական նպատակն է՝ այդ կապերը վերածել եռակողմ ձևաչափի։ Այս մասին հայտարարել է Ադրբեջանում գտնվող Իրանի ԱԳ փոխնախարար, Միջազգային ու քաղաքական հարցերի հետազոտությունների կենտրոնի ղեկավար Մուհամմադ Քազիմ Սաջագպուրը երեք երկրների վերլուծական կենտրոնների ղեկավարների հանդիպման ընթացքում, հաղորդում են ադրբեջանական լրատվամիջոցները։ 

Նա հատուկ նշել է ուղեղային կենտրոնների կարևորությունը՝ երկրների միջև նոր հնարավորությունների զարգացման գործում։ 

Իրանի ԱԳ փոխնախարարը շնորհավորել է Ադրբեջանին «օկուպացված տարածքների ազատագրման» կապակցությամբ ու նշել, որ առաջացած նոր իրականությունը ոչ միայն «ազգային, այլև տարածաշրջանային» հարց է։ 

Ադրբեջանի Միջազգային հարաբերությունների հետազոտությունների կենտրոնի ղեկավար Ֆարիդ Շաֆիևն էլ ասել է, որ հետազոտական կենտրոնների ձևաչափը հարմար հարթակ է ցանկացած հարցի քննարկման համար։ 

«Մեր նպատակն է՝ քննարկել նոր աշխարհաքաղաքական իրավիճակը Ղարաբաղյան երկրորդ պատերազմից հետո, տարածաշրջանում համագործակցության նոր ներուժը, այդ թվում՝ տրանսպորտային և այլ նախագծերը»,- ասել է Շաֆիևը։ 

Թուրքական հետազոտական կենտրոնի ղեկավար Հաքքի Ույգուրն իր հերթին նշել է, որ Ադրբեջանը, Իրանն ու Թուրքիան ունեն ընդհանուր արժեքներ՝ պատմության, մշակույթի և ինքնության։ Միաժամանակ, ըստ նրա, բոլոր երեք երկրները տարածաշրջանում հաճախ բախվում են ընդհանուր սպառնալիքների ու մարտահրավերների, և նման հանդիպումները լավ հնարավորություն են տալիս վերլուծելու տարածաշրջանի քաղաքական գործընթացները:

Ույգուրը նաև տեղեկացրել է, որ համաժողովի ընթացքում քննարկվելու է Աֆղանստանում տիրող իրավիճակն ու Արցախի հիմնախնդիրը։ Միջոցառման արդյունքում նաև զեկույց է պատրաստվելու։ 

Հաղորդվում է, որ վաղը միջոցառման մասնակիցներն այցելելու են Արցախի գրավյալ Ակնա քաղաք։ 

Էմմա Չոբանյան