27.11.2024 | 13:59
Հրադադարի ֆոնին՝ հարավային Լիբանանի տեղահանված բնակիչները սկսել են վերադառնալ իրենց տները
Ֆրանսիայի և ԱՄՆ-ի միջև ճգնաժամի ֆոնին Էմանուել Մակրոնն ու Ջո Բայդենն այսօր հեռախոսազրույց կունենան
Քաղաքականություն
22.09.2021 | 16:43
Այսօր սպասվում է Ֆրանսիայի և Միացյալ Նահանգների նախագահներ Էմանուել Մակրոնի և Ջո Բայդենի հեռախոսազրույցը: Այս մասին Air Force One օդանավում լրագրողներին հայտնել է Սպիտակ տան խոսնակ Ջեն Փսակին, երբ Բայդենի՝ Նյու Յորքից Վաշինգտոն վերադարձի ընթացքում։
Նա նաև տեղեկացրել է, որ երկու երկրների ղեկավարների աշխատակազմերն ավարտում են մանրամասների քննարկումը՝ հեռախոսազանգը կազմակերպելու համար, գրում է Reuters-ը։
Ֆրանսիայի կառավարության պաշտոնական ներկայացուցիչ Գաբրիել Աթալն իր հերթին հայտնել է, որ առավոտյան տեղի ունեցած կառավարության նիստի ընթացքում Մակրոնն անդրադարձել է Ավստրալիայի հետ ֆրանսիական սուզանավերի մատակարարման պայմանագրի խզման հանգամանքներին։
«Հաջորդ քայլը կլինի նախագահի և նրա ամերիկացի գործընկեր Ջո Բայդենի հեռախոսազրույցը։ Զրույցը սպասվում է այսօր»,- ասել է նա:
Հիշեցնենք, որ ԱՄՆ-ի, Մեծ Բրիտանիայի և Ավստրալիայի միջև AUKUS նոր դաշինքը, որը ստորագրվել է սեպտեմբերի 15-ին, առաջացրել է խոր դիվանագիտական ճգնաժամ Վաշինգտոնի և Փարիզի միջև: Դաշինքի կազմում Ավստրալիան կհամալրվի միջուկային սուզանավերով: Այս պայմանագրի պատճառով Ավստրալիան հրաժարվել է 66 միլիարդ դոլար արժողությամբ սուզանավերի ձեռքբերման վերաբերյալ ֆրանսիական ընկերության հետ պայմանագրից, ինչը զայրացրել է Փարիզին:
Այսօր ավելի վաղ Ֆրանսիայի, ԱՄՆ-ի, Մեծ Բրիտանիայի և Գերմանիայի ԱԳ նախարարների հանդիպումը Նյու Յորքում ՄԱԿ-ի Գլխավոր վեհաժողովի շրջանակում ձախողվել է, քանի որ Ֆրանսիայի ԱԳ նախարարը հրաժարվել է մասնակցել դրան։
Տաթև Ֆռանգյան
